స్నానం చేస్తున్నప్పుడు తెలియకుండానే చాలామంది చేసే పనుల్లో షవర్ కింద మూత్ర విసర్జన చేయడం ఒకటి. వినడానికి కొంచెం వింతగా, అసహ్యంగా అనిపించినా.. ప్రపంచవ్యాప్తంగా చాలామందికి ఈ అలవాటు ఉంది. అయితే ఇలా చేయడం వల్ల నీళ్లు ఆదా అవుతాయని కొందరు భావిస్తే, దీనివల్ల ఆరోగ్య సమస్యలు వస్తాయని డాక్టర్లు హెచ్చరిస్తున్నారు. అసలు ఈ అలవాటు మన మెదడును, మూత్రాశయాన్ని ఎలా ప్రభావితం చేస్తుందోఇప్పుడు క్లియర్ గా తెలుసుకుందాం.
షవర్ కింద మూత్ర విసర్జన చేయడం వల్ల మన మెదడు ఒక రకమైన కండిషనింగ్కు గురవుతుంది. అంటే, ప్రవహించే నీటి శబ్దం వినగానే మూత్రం విసర్జించాలనే సంకేతాన్ని మెదడు పంపిస్తుంది. ఇక దీనివల్ల భవిష్యత్తులో బయట వర్షం పడుతున్నా లేదా ఎక్కడైనా నీటి శబ్దం వినిపించినా కంట్రోల్ చేసుకోలేక మూత్రం పడిపోయే ప్రమాదం ఉంది. దీన్నే సైకాలజీలో ‘పావ్లోవియన్ రెస్పాన్స్’ అని పిలుస్తారు.
మనం నిలబడి మూత్ర విసర్జన చేసినప్పుడు మూత్రాశయం (Bladder) పూర్తిగా ఖాళీ కాదు. కూర్చున్నప్పుడు లేదా స్క్వాటింగ్ పొజిషన్లో ఉన్నప్పుడు పెల్విక్ కండరాలు రిలాక్స్ అయ్యి మూత్రం మొత్తం బయటకు వస్తుంది. కానీ నిలబడి చేయడం వల్ల కండరాలు పూర్తిగా రిలాక్స్ అవ్వవు. ఇక దీనివల్ల కాలక్రమేణా పెల్విక్ ఫ్లోర్ కండరాలు బలహీనపడి, యూరిన్ లీకేజీ వంటి సమస్యలకు దారితీసే అవకాశం ఉంటుంది.
చాలామంది మూత్రం శుభ్రమైనదని (Sterile) భావిస్తారు, కానీ అది నిజం కాదు. మూత్రంలో బ్యాక్టీరియా మరియు శరీరంలోని వ్యర్థాలు ఉంటాయి. స్నానం చేసేటప్పుడు అక్కడ ఏవైనా చిన్న గాయాలు ఉన్నా లేదా చర్మం సున్నితంగా ఉన్నా, మూత్రంలోని బ్యాక్టీరియా వల్ల ఇన్ఫెక్షన్లు వచ్చే అవకాశం ఉంటుంది. ఇక ముఖ్యంగా మహిళల్లో యూరినరీ ట్రాక్ట్ ఇన్ఫెక్షన్స్ (UTI) వచ్చే రిస్క్ పెరుగుతుందని వైద్యులు చెబుతుంటారు.
షవర్ కింద మూత్ర విసర్జన చేయడం వల్ల నీరు ఆదా అవుతుందని ఒక వాదన ఉంది. అయితే, పరిశుభ్రత పరంగా చూస్తే ఇది అంత మంచి పద్ధతి కాదు. బాత్టబ్ లేదా షవర్ ఏరియాలో మూత్రం ఆగిపోవడం వల్ల అక్కడ బ్యాక్టీరియా పెరిగి దుర్వాసన వచ్చే అవకాశం ఉంది. ఇక ఇది మీకే కాకుండా మీ తర్వాత స్నానానికి వెళ్లే కుటుంబ సభ్యులకు కూడా ఇబ్బంది కలిగించవచ్చు.
ఆరోగ్యకరమైన జీవనశైలి కోసం స్నానానికి వెళ్లే ముందే టాయిలెట్కు వెళ్లడం అలవాటు చేసుకోవాలి. ఒకవేళ స్నానం మధ్యలో యూరిన్ వస్తే, కాసేపు ఆగి బయటకు వచ్చి టాయిలెట్ వాడటం ఉత్తమం. ప్రవహించే నీటి శబ్దానికి మీ మెదడు స్పందించకుండా ఉండాలంటే ఈ చిన్న మార్పు చాలా అవసరం. శారీరక ఆరోగ్యంతో పాటు మానసిక కండిషనింగ్ను సరిచేసుకోవడానికి ఇది సరైన మార్గం.
గమనిక: ఈ సమాచారం కేవలం అవగాహన కోసం మాత్రమే. మీకు మూత్రాశయానికి సంబంధించిన లేదా మూత్ర విసర్జనలో ఏవైనా ఇబ్బందులు ఉంటే వెంటనే యూరాలజిస్ట్ను సంప్రదించడం మంచిది.
