మనలో చాలామందికి ఉదయాన్నే వేడివేడి టిఫిన్ తిన్నాక, ఒక కప్పు టీ పడకపోతే ముద్ద దిగదు. అది ఒక అలవాటుగా మారిపోయింది. కానీ, ఆరోగ్య నిపుణులు మాత్రం ఈ విషయంలో ఒక గట్టి హెచ్చరిక జారీ చేస్తున్నారు. టిఫిన్ లేదా భోజనం చేసిన వెంటనే టీ తాగడం వల్ల మనం తిన్న ఆహారంలోని పోషకాలు శరీరానికి అందకుండా పోతాయట. అసలు టీకి, మన తిండికి ఉన్న సంబంధం ఏంటి? అది మన ఆరోగ్యాన్ని ఎలా దెబ్బతీస్తుందో ఇప్పుడు తెలుసుకుందాం.
పోషకాలను అడ్డుకునే టీ: మనం తిన్న ఆహారం నుంచి మన శరీరానికి ఐరన్ (ఇనుము) చాలా అవసరం. అయితే టీలో ఉండే ‘టానిన్స్’, ‘పాలీఫెనాల్స్’ అనే పదార్థాలు మనం తిన్న ఆహారంలోని ఐరన్ను శరీరం పీల్చుకోకుండా అడ్డుకుంటాయి. ఇక దీనివల్ల ఎంత మంచి ఫుడ్ తిన్నా, శరీరానికి అందాల్సిన శక్తి అందదు.
జీర్ణక్రియలో ఇబ్బందులు: చాలామంది టీ తాగితే అరుగుదల బాగుంటుందని నమ్ముతారు. కానీ వాస్తవానికి, భోజనం తర్వాత వెంటనే టీ తాగడం వల్ల కడుపులో యాసిడ్స్ సమతుల్యత దెబ్బతింటుంది. దీనివల్ల గ్యాస్, ఎసిడిటీ లేదా అజీర్ణం వంటి సమస్యలు వచ్చే అవకాశం ఉంది. ఇక ముఖ్యంగా ప్రోటీన్ ఎక్కువగా ఉండే ఆహారం తిన్నప్పుడు టీ తాగడం అస్సలు మంచిది కాదు.
రక్తహీనత ముప్పు: ఎవరైతే క్రమం తప్పకుండా భోజనం తర్వాత టీ తాగుతారో, వారిలో కాలక్రమేణా ఐరన్ లోపం ఏర్పడే ప్రమాదం ఉంది. ఇది రక్తహీనతకు (Anemia) దారి తీస్తుంది. తరచూ అలసటగా అనిపించడం, నీరసం రావడం వంటివి దీని లక్షణాలే. అందుకే టీ తాగే విషయంలో కొంచెం గ్యాప్ ఇవ్వడం చాలా ముఖ్యం.
సరైన సమయం ఏది?: టీ తాగకూడదని దీని అర్థం కాదు, కానీ సమయం ముఖ్యం. మీరు టిఫిన్ లేదా భోజనం చేసిన తర్వాత కనీసం 45 నిమిషాల నుంచి ఒక గంట వరకు ఆగాలి. ఇక అప్పుడు మీ శరీరం ఆహారంలోని పోషకాలను గ్రహిస్తుంది. ఆ తర్వాత హాయిగా మీ ఫేవరెట్ టీని ఎంజాయ్ చేయవచ్చు.
టీ అనేది ఒక అద్భుతమైన పానీయం, కానీ దాన్ని సరైన సమయంలో తాగినప్పుడే మనకు ప్రయోజనం. చిన్న మార్పుతో మన ఆరోగ్యాన్ని కాపాడుకోవచ్చు కాబట్టి, రేపటి నుంచి టిఫిన్ తర్వాత కాసేపు ఆగి టీ తాగడం అలవాటు చేసుకోండి.
గమనిక: మీకు ఇప్పటికే రక్తహీనత లేదా జీర్ణ సంబంధిత సమస్యలు ఉంటే, మీ ఆహారపు అలవాట్లపై ఒకసారి డాక్టర్ను సంప్రదించడం మంచిది.
