ఆంధ్రప్రదేశ్లోని చేనేత కుటుంబాల కళ్లల్లో ఆనందం చూశారా? ఎన్నికల వేళ ఇచ్చిన ఒక పెద్ద హామీని నెరవేరుస్తూ.. ముఖ్యమంత్రి చంద్రబాబు నేతృత్వంలోని కూటమి ప్రభుత్వం చేనేత కార్మికులకు ఉచిత విద్యుత్ పథకాన్ని ప్రకటించింది. నేతన్నల జీవితాల్లో కొత్త వెలుగులు నింపేందుకు తెచ్చిన ఈ చారిత్రాత్మక నిర్ణయం ఏప్రిల్ 1 నుంచి అమల్లోకి వస్తోంది. కరెంట్ బిల్లుల భారం నుంచి విముక్తి కలిగిస్తూ ప్రభుత్వం తీసుకున్న ఈ నిర్ణయం ఇప్పుడు రాష్ట్రవ్యాప్తంగా హాట్ టాపిక్గా మారింది.
చేనేతలకు 200.. పవర్లూమ్లకు 500 యూనిట్లు ఫ్రీ: చేనేత వృత్తి అంటేనే ఎంతో కష్టం. రంగులు అద్దడం దగ్గరి నుంచి ముడిసరుకు సిద్ధం చేయడం, నేత పనులు పూర్తి చేయడం వరకు ప్రతి దశలోనూ విద్యుత్ అవసరం చాలా ఉంటుంది. అయితే పెరుగుతున్న ఖర్చులతో నేతన్నలు తీవ్ర ఇబ్బందులు పడుతున్నారు.
ఈ కష్టాలను గుర్తించిన ప్రభుత్వం, చేనేత మగ్గాలకు నెలకు 200 యూనిట్ల వరకు, అలాగే పవర్లూమ్లకు (మరమగ్గాలకు) ఏకంగా 500 యూనిట్ల వరకు ఉచితంగా విద్యుత్ను సరఫరా చేయాలని నిర్ణయించింది. ఈ నిర్ణయం వారి ఉత్పత్తి వ్యయాన్ని తగ్గించి, చేనేత రంగానికి నిజమైన ఊపిరి పోస్తుందనడంలో ఎలాంటి సందేహం లేదు.
ఈ పథకం వల్ల ఎంతమందికి లాభం చేకూరుతుందో తెలుసా?: ఒక పథకం తెచ్చినప్పుడు అది ఎంతమందికి చేరుతుందనేది చాలా ముఖ్యం కదా! ప్రభుత్వ లెక్కల ప్రకారం ఈ నిర్ణయంతో రాష్ట్రవ్యాప్తంగా ఉన్న 1,04,488 చేనేత కుటుంబాలకు నేరుగా ప్రయోజనం కలుగుతుంది. ఇందులో సుమారు 93,000 చేనేత మగ్గాల కుటుంబాలు ఉండగా, 11,488 పవర్లూమ్ కుటుంబాలు ఉన్నాయి.
ఈ పథకం కోసం ప్రభుత్వం ఏటా దాదాపు రూ.150 కోట్లు ఖర్చు చేయనుంది. దీనివల్ల సాధారణ చేనేత కుటుంబానికి ఏడాదికి రూ.8,640 వరకు, పవర్లూమ్ యూనిట్కు ఏటా రూ.21,600 వరకు ఆర్థికంగా కలిసి రానుంది.
కేవలం ఉచిత విద్యుత్ మాత్రమేనా.. ఇంకేం ఇస్తున్నారు?: ప్రభుత్వం కేవలం కరెంట్ మాత్రమే ఫ్రీగా ఇచ్చి ఊరుకోలేదు. చేనేత రంగాన్ని పూర్తిగా గాడిన పెట్టేందుకు మరిన్ని అదిరిపోయే వరాలు ప్రకటించింది. అధికారంలోకి వచ్చిన వెంటనే నేతన్నల పెన్షన్ను రూ.4 వేలకు పెంచింది. రూ.5 కోట్ల విలువైన త్రిఫ్ట్ ఫండ్ నిధులను విడుదల చేసింది.ఇక ఆధునిక యంత్రాల కొనుగోలుపై 90 శాతం రాయితీ, ముడిసరుకులపై 15 శాతం సబ్సిడీ ఇస్తోంది. ఇక చిన్న తరహా క్లస్టర్ల అభివృద్ధి కోసం రూ.10.44 కోట్లు కేటాయించింది.
ఆన్లైన్ మార్కెటింగ్ సదుపాయం ఎలా ఉండబోతోంది?: మనం తయారు చేసిన వస్తువు ఎంత బాగున్నా, అది జనాల్లోకి వెళ్లనప్పుడు లాభం ఉండదు కదా, అందుకే నేతన్నల ఉత్పత్తులను నేరుగా ప్రజల్లోకి తీసుకెళ్లడానికి ప్రభుత్వం ఒక స్మార్ట్ ప్లాన్ వేసింది. ఇప్పుడు అమెజాన్, ఫ్లిప్కార్ట్ వంటి దిగ్గజ ఆన్లైన్ ఈ-కామర్స్ వేదికల ద్వారా చేనేత వస్త్రాల మార్కెటింగ్కు సదుపాయం కల్పిస్తోంది. దీనివల్ల మన చేనేత కళాకారుల ప్రతిభ ప్రపంచవ్యాప్తంగా గుర్తింపు పొందడమే కాకుండా వారికి మంచి లాభాలు కూడా వచ్చే అవకాశం ఉంది.
