మన వంటింట్లో కొత్తిమీర లేని వంటకాన్ని ఊహించలేము. కేవలం గార్నిషింగ్ కోసమే కాదు, అద్భుతమైన సువాసనతో ఆకలిని పెంచే శక్తి దీనికి ఉంది. ఆయుర్వేదం ప్రకారం కొత్తిమీర ఒక గొప్ప ఔషధం. జీర్ణ సమస్యల నుండి కంటి జబ్బుల వరకు ఇది చేసే మేలు అంతా ఇంతా కాదు. అయితే, అందరికీ అమృతంలా పనిచేసే ఈ ఆకుకూర, కొందరికి మాత్రం ఇబ్బందులు తెచ్చిపెడుతుంది. ఆ ఆసక్తికరమైన విషయాలేంటో ఇప్పుడు తెలుసుకుందాం.
పొట్ట సమస్యలకు దివ్యౌషధం: అజీర్ణం, గ్యాస్, కడుపులో మంట వంటి సమస్యలతో బాధపడేవారికి కొత్తిమీర ఒక వరంలా పనిచేస్తుంది. కొత్తిమీర కషాయంలో పాలు, పంచదార కలిపి తీసుకుంటే రక్తం పడే మూలశంక (పైల్స్) వంటి రోగాలు కూడా తగ్గుముఖం పడతాయని ఆయుర్వేద నిపుణులు చెబుతున్నారు. ఇది మన జీర్ణవ్యవస్థను మెరుగుపరిచి, అధిక దాహాన్ని కూడా తగ్గిస్తుంది.
కంటి ఆరోగ్యానికి మేలు: కొత్తిమీరను వేడి చేసి కళ్లపై వేసి కట్టినా లేదా నెయ్యితో వేయించిన ఆకులను కనురెప్పలపై ఉంచినా నేత్ర సంబంధిత సమస్యలు తగ్గుతాయని పూర్వీకుల నమ్మకం. కళ్లలో మంటలు, అలసటను తగ్గించడంలో ఇది బాగా సహాయపడుతుంది. అలాగే ఇక నోరు పూతతో ఇబ్బంది పడేవారు కొత్తిమీర రసంతో పుక్కిలిస్తే త్వరగా ఉపశమనం లభిస్తుంది.
మెదడుకు చలువ.. మూత్ర విసర్జన సులువు: వంటల్లో తరచుగా కొత్తిమీరను వాడటం వల్ల మెదడులో ఉండే వేడి తగ్గుతుంది. అంతేకాదు, ఇది సహజమైన డైయూరిటిక్లా పనిచేసి మూత్ర విసర్జన సాఫీగా జరిగేలా చూస్తుంది. కొత్తిమీర, పచ్చిమిర్చి, ఉప్పు, నిమ్మరసం కలిపి చేసుకునే పచ్చడి రుచికి రుచితో పాటు శరీరంలోని పైత్యాన్ని కూడా తగ్గిస్తుంది.
ప్రసవ సమయంలో నమ్మకాలు: పూర్వకాలంలో కొన్ని తెగల వారు ప్రసవించే స్త్రీల దగ్గర కొత్తిమీరను ఉంచేవారు. ఇలా చేయడం వల్ల ప్రసవం త్వరగా, సులువుగా జరుగుతుందని వారి నమ్మకం. అయితే, డెలివరీ పూర్తయిన వెంటనే అక్కడి నుండి ఆ కొత్తిమీరను తీసివేసేవారు. ఇక ఇలా కొత్తిమీర కేవలం ఆహారంగానే కాకుండా మన సంప్రదాయాల్లోనూ భాగమైంది.
ఎవరు దూరంగా ఉండాలి?: కొత్తిమీరలో ఇన్ని గుణాలు ఉన్నప్పటికీ ‘గ్రహణ రోగం’ వంటి సమస్యలతో బాధపడేవారు మాత్రం దీనికి దూరంగా ఉండాలని ఆయుర్వేద వైద్యులు హెచ్చరిస్తున్నారు. అటువంటి వారు కొత్తిమీరను వాడటం వల్ల ఆరోగ్య సమస్యలు తలెత్తే అవకాశం ఉంది.
ప్రకృతి మనకు ప్రసాదించిన అద్భుతమైన ఆకుకూరల్లో కొత్తిమీర ఒకటి. దీనిని సరైన పద్ధతిలో వాడుకుంటే ఆరోగ్యం మన చేతుల్లోనే ఉంటుంది. ఇక వంటల్లో రుచిని పెంచుకుంటూనే, ఆరోగ్యాన్ని కూడా కాపాడుకుందాం.
గమనిక: తీవ్రమైన ఆరోగ్య సమస్యలు ఉన్నవారు లేదా ఏదైనా ప్రత్యేక చికిత్స పొందుతున్నవారు ఆయుర్వేద నిపుణుల సలహా తీసుకున్న తర్వాతే ఇలాంటి సహజ సిద్ధమైన ఔషధాలను ప్రయత్నించాలి.
