మన జీవితంలో 30 ఏళ్ల వయసు అనేది చాలా కీలకమైన స్టేజ్. ఈ టైమ్లోనే కెరీర్లో సెటిల్ అవ్వాలని, ఇల్లు, ఫ్యామిలీ అంటూ ప్రతీ ఒక్కరూ తెగ టెన్షన్ పడుతుంటారు. ఈ బిజీ లైఫ్లో చాలా మంది తమ ఆరోగ్యాన్ని పూర్తిగా నిర్లక్ష్యం చేస్తుంటారు. ముఖ్యంగా బ్లడ్ ప్రెషర్ (బీపీ) గురించి అస్సలు పట్టించుకోరు. కానీ, 30 ఏళ్ల వయసులో బీపీ కాస్త పెరిగినా దాన్ని లైట్ తీసుకుంటే, 50 ఏళ్లకు వచ్చేసరికి అది పెద్ద ప్రమాదంగా మారుతుందని తాజా అధ్యయనాలు హెచ్చరిస్తున్నాయి.
20 ఏళ్ల రీసెర్చ్లో తేలిన నిజాలు: పరిశోధకులు దాదాపు 20 సంవత్సరాల పాటు 6,000 మందిని నిశితంగా గమనించి ఈ విషయాన్ని కనిపెట్టారు. మన శరీరంలో సిస్టోలిక్ బ్లడ్ ప్రెషర్ (పై రీడింగ్) కేవలం 10 mmHg పెరిగినా సరే.. భవిష్యత్తులో గుండె సంబంధిత వ్యాధులు వచ్చే ఛాన్స్ 20 శాతం వరకు పెరుగుతుందట. అంటే ఇక మనం చూసే చిన్న మార్పు కూడా వయసు పైబడిన తర్వాత మన గుండెపై చాలా పెద్ద నెగెటివ్ ప్రభావాన్ని చూపిస్తుందన్నమాట.
‘నార్మల్’ అనుకుంటే పొరపాటే: చాలా మంది 140/90 దాటితేనే హై బీపీ అని, అప్పటివరకు అంతా నార్మల్ అని అనుకుంటారు. కానీ నిపుణులు చెబుతున్న దాని ప్రకారం.. బీపీ ఆ రేంజ్ కి చేరడానికి ముందే రక్తనాళాలు దెబ్బతినడం మొదలవుతుంది. ఇక బీపీ అనేది ఒకే దగ్గర ఆగిపోయేది కాదు, వయసుతో పాటు క్రమంగా పెరుగుతూ పోయే రిస్క్ ఫ్యాక్టర్. అందుకే 30 ఏళ్ల నుంచే దీనిపై ఓ కన్నేసి ఉంచాలి. ఇది అటు పురుషులు, ఇటు మహిళలు ఇద్దరిపైనా ఒకేలా ప్రభావం చూపిస్తుంది.
భయపడకండి.. కానీ జాగ్రత్త పడండి: ఈ విషయాలు వినగానే యువకులు కంగారు పడాల్సిన అవసరం లేదు. ఎందుకంటే యంగ్ ఏజ్లో దీని వల్ల వచ్చే తక్షణ ప్రమాదం తక్కువే ఉంటుంది. కానీ, నిర్లక్ష్యం చేయడం మాత్రం అస్సలు మంచిది కాదు. ఇక ఎందుకంటే ఈ రోజుల్లో యువతలో డయాస్టోలిక్ బీపీ (కింది రీడింగ్) కూడా ఎక్కువగా పెరుగుతోంది. కాబట్టి, ఇప్పటి నుంచే మంచి లైఫ్స్టైల్ అలవాటు చేసుకోవడం ద్వారా భవిష్యత్తులో వచ్చే పెద్ద పెద్ద ముప్పుల నుంచి ఈజీగా తప్పించుకోవచ్చు.
30 ఏళ్ల వయసులో కెరీర్ ఎంత ముఖ్యమో.. ఆరోగ్యం కూడా అంతే ముఖ్యం. అప్పుడే 50 ఏళ్లు దాటిన తర్వాత కూడా హ్యాపీగా, హెల్తీగా లైఫ్ని ఎంజాయ్ చేయగలుగుతాం. కాబట్టి రోజువారీ టెన్షన్లను పక్కన పెట్టి, హెల్తీ ఫుడ్ తింటూ బీపీని కంట్రోల్లో ఉంచుకోవడానికి ట్రై చేయండి.
గమనిక: మీ వయసు 30 దాటితే ఏడాదికి కనీసం ఒక్కసారైనా బీపీ చెక్ చేయించుకోండి. రోజువారీ ఆహారంలో ఉప్పు తగ్గించడం, రోజుకు 30 నిమిషాలు నడవడం లేదా వ్యాయామం చేయడం వల్ల బీపీని చాలా వరకు అదుపులో ఉంచుకోవచ్చు.
