చాలా మంది వయసు పెరిగిపోతోందని కంగారుపడుతుంటారు. కానీ ఆరోగ్య నిపుణుల ప్రకారం వయసు అనేది కేవలం ఒక నంబర్ మాత్రమే, మన శరీరంలోని కండరాల బలమే మన అసలు ఆరోగ్యాన్ని నిర్ణయిస్తుంది. మన ఒంట్లో ఉండే కొన్ని కీలకమైన కండరాలు మనం ఎంత కాలం ఆరోగ్యంగా, ఫిట్గా బతుకుతామో చెప్పే బయోమార్కర్లుగా పనిచేస్తాయి. ల్యాబ్ టెస్టులతో పనిలేకుండా, మీ శరీరం లోపల ఎంత బలంగా ఉందో ఇంట్లోనే చిన్న చిన్న పరీక్షల ద్వారా తెలుసుకోవచ్చు. ఆ రహస్యాలు ఏంటో ఇప్పుడు చూద్దాం.
చేతి పట్టు (గ్రిప్ స్ట్రెంత్).. గుండె ఆరోగ్యానికి గుర్తు: మనం ఎవరికైనా ఇచ్చే హ్యాండ్షేక్ కేవలం మర్యాద కోసం మాత్రమే కాదు, అది మీ నరాలు, గుండె, మెదడు పనితీరును చెబుతుంది. ‘ది లాన్సెట్’ మెడికల్ జర్నల్ ప్రకారం, బ్లడ్ ప్రెషర్ కంటే కూడా చేతి పట్టు బలహీనంగా ఉండటమే మరణాల ముప్పును ఎక్కువగా సూచిస్తుందట. ఇక దీన్ని పరీక్షించడానికి ఒక రాడ్కు చేతులతో వేలాడండి. 50 ఏళ్ల లోపు వారైతే పురుషులు 30 సెకన్లు, మహిళలు 20 సెకన్ల పాటు వేలాడగలిగితే మీ గుండె, శరీరం పటిష్టంగా ఉన్నట్టే.
గ్లూట్స్ కండరాలు.. శరీర బ్యాలెన్స్కు ముఖ్యం: మనం నడవాలన్నా, నిలబడాలన్నా శరీరం బ్యాలెన్స్ తప్పకుండా చూసుకునేవి నిరుత్సాహపడకుండా ఉంచే గ్లూట్స్ (నడుము కింది భాగం) కండరాలు. వయసు పెరిగే కొద్దీ ఇవి బలహీనపడితే అడుగులు తడబడి కిందపడే ప్రమాదం ఉంది. పెద్ద వయసులో ఒక్కసారి కిందపడినా కోలుకోవడం కష్టం. ఇక అందుకే కళ్ళు మూసుకుని ఒక కాలిపై నిలబడండి. 50 ఏళ్ల లోపు వారు శరీరం ఊపకుండా కనీసం 10 సెకన్లు నిలబడగలిగితే ఈ కండరాలు బలంగా ఉన్నాయని అర్థం.
పిక్కల కండరాలు.. వేగంగా కోలుకునే శక్తి: మన పిక్కల పరిమాణం, బలం.. శరీరంలో ఎంత కండరాల నిల్వ ఉందో చెప్తుంది. ఇక ఏదైనా అనారోగ్యం లేదా గాయం అయినప్పుడు మీ శరీరం ఎంత వేగంగా కోలుకుంటుందో చెప్పడానికి సాధారణ బ్లడ్ టెస్టుల కంటే కూడా ఈ కండరాల బలమే సరైన కొలమానం. దీన్ని టెస్ట్ చేయడానికి, ఒక కాలి బొటనవేలుపై నిలబడి పిక్కలను పైకి లేపండి. 40 ఏళ్ల లోపు వారు అలసట లేకుండా, ప్రతి కాలుతో విడివిడిగా 25 సార్లు (Reps) చేయగలిగితే మీ రికవరీ పవర్ సూపర్ అని చెప్పొచ్చు.
శ్వాసకోశ కండరం (డయాఫ్రమ్).. ఊపిరితిత్తుల బలం: మన శ్వాస వ్యవస్థలో డయాఫ్రమ్ అత్యంత కీలకమైన కండరం. కానీ చాలామంది దీన్ని పట్టించుకోరు. దీనివల్ల 70 ఏళ్ల వయసుకు వచ్చేసరికి ఇది తన శక్తిలో 30 శాతం కోల్పోతుంది. ఇది బలహీనపడితే ప్రశాంతంగా లోతైన శ్వాస తీసుకునే సామర్థ్యం దెబ్బతింటుంది. దీన్ని పరీక్షించడానికి, లోతైన శ్వాస తీసుకుని బిగపట్టండి. ఎటువంటి ఇబ్బంది లేకుండా 30 సెకన్ల పాటు శ్వాసను బిగపట్టగలిగితే, మీ డయాఫ్రమ్ సంపూర్ణంగా పనిచేస్తోందని అర్థం.
60 ఏళ్ల వయసు దాటిన తర్వాత కూడా ఎవరిపైనా ఆధారపడకుండా, స్ట్రాంగ్గా జీవించాలంటే ఈ 4 కండరాలకు క్రమంతప్పకుండా వ్యాయామం అందించడం చాలా ముఖ్యం. వ్యాయామాల ద్వారా మీ బయోలాజికల్ వయసును తగ్గించుకుని, ఎక్కువ కాలం ఫిట్గా ఉండవచ్చు. కాబట్టి ఈ రోజు నుండే మీ కండరాల బలాన్ని పెంచే చిన్న చిన్న వర్కవుట్స్ ప్రారంభించండి.
గమనిక :పైన పేర్కొన్న ఫిట్నెస్ పరీక్షలు మరియు సమయ నిడివి సాధారణ ఆరోగ్య సూచనల ఆధారంగా ఇవ్వబడినవి. ఎముకలు, కీళ్ల నొప్పులు లేదా ఇతర ఆరోగ్య సమస్యలు ఉన్నవారు ఈ పరీక్షలను నిపుణులు లేదా వైద్యుల పర్యవేక్షణలోనే చేయడం సురక్షితం.
