మన దేశంలో చిన్న జలుబు, తలనొప్పి వచ్చినా సరే వెంటనే మెడికల్ షాప్కి వెళ్లి టాబ్లెట్లు కొనేసి వేసేసుకుంటూ ఉంటాం. కానీ, మనం వాడే కొన్ని రకాల మందులు మన ఆరోగ్యానికి ఎంతో ముప్పని నిపుణులు హెచ్చరిస్తున్నారు. తాజాగా ప్రజల ఆరోగ్యాన్ని కాపాడటం కోసం కేంద్ర ప్రభుత్వం ఒక కీలకమైన నిర్ణయం తీసుకుంది. దేశవ్యాప్తంగా వాడుకలో ఉన్న 16 రకాల ఫిక్స్డ్ డోస్ కాంబినేషన్ (FDC) మందుల తయారీ, సేల్స్ మరియు వినియోగంపై పూర్తి స్థాయిలో నిషేధం విధించింది.
కేంద్రం ఎందుకు ఈ నిర్ణయం తీసుకుంది?: ఫిక్స్డ్ డోస్ కాంబినేషన్ (FDC) అంటే రెండు లేదా అంతకంటే ఎక్కువ మందులను కలిపి ఒకే టాబ్లెట్ లేదా సిరప్గా తయారు చేయడం. అయితే, ఈ 16 రకాల కాంబినేషన్ మందులు ప్రజల ఆరోగ్యానికి మేలు చేయడం కంటే ఎక్కువగా హాని కలిగించే అవకాశం ఉందని కేంద్ర ప్రభుత్వ నిపుణుల కమిటీ తేల్చింది. దీనిపై పూర్తి పరిశోధనలు చేసిన తర్వాతే నిపుణులు ఇచ్చిన రిపోర్ట్ ఆధారంగా కేంద్రం ఈ మందులను బ్యాన్ చేసింది.
తక్షణమే అమల్లోకి వచ్చిన ఆంక్షలు: ఈ నిషేధిత 16 మందులకు సంబంధించి ఎలాంటి తయారీ పనులు జరగకూడదని, అలాగే మార్కెట్లో వీటి పంపిణీ, విక్రయాలు పూర్తిగా ఆపేయాలని అధికారులు స్పష్టమైన ఆదేశాలు జారీ చేశారు. ఈ ఆంక్షలు తక్షణమే దేశవ్యాప్తంగా అమల్లోకి వచ్చాయని, రూల్స్ బ్రేక్ చేస్తే కఠిన చర్యలు ఉంటాయని డ్రగ్ కంట్రోల్ అధికారులు హెచ్చరిస్తున్నారు.
FDC మందుల వల్ల వచ్చే ముప్పు ఇదే: నిపుణుల ప్రకారం.. కొన్ని రకాల కాంబినేషన్ మందులను డాక్టర్ల ప్రిస్క్రిప్షన్ లేకుండా విచ్చలవిడిగా వాడటం వల్ల శరీరంలో యాంటీబయాటిక్ రెసిస్టెన్స్ పెరుగుతుంది. అంతేకాకుండా లివర్, కిడ్నీలపై తీవ్ర ప్రభావం పడే ప్రమాదం ఉంది. అందుకే రోగుల భద్రత కోసం ప్రభుత్వం ఈ మందులను మార్కెట్ నుండి తొలగించాలని డిసైడ్ అయింది.
ఇక ప్రజల ప్రాణాలకు రక్షణగా కేంద్ర ప్రభుత్వం తీసుకున్న ఈ నిర్ణయం నిజంగా అభినందనీయం. మందుల వల్ల వచ్చే సైడ్ ఎఫెక్ట్స్ నుండి సామాన్యులను కాపాడటానికి ఇలాంటి కఠినమైన ఆంక్షలు ఎంతో అవసరం.
