భారతీయ టెక్ ప్రపంచంలో ఒక సరికొత్త చరిత్ర లిఖించబడింది. ప్రముఖ మెసేజింగ్ ప్లాట్ఫామ్ వాట్సాప్ (WhatsApp) గ్లోబల్ హెడ్గా భారతీయ స్టార్టప్ స్టార్ కునాల్ షా నియమితులయ్యారు. ఇప్పటివరకు ఈ బాధ్యతల్లో ఉన్న విల్ క్యాథ్కార్ట్ స్థానంలో కునాల్ షా పగ్గాలు చేపట్టబోతున్నారు. మెటా (Meta) సంస్థ కునాల్ షా నేతృత్వంలోని ‘క్రెడ్’ కంపెనీలో ఏకంగా 900 మిలియన్ డాలర్ల భారీ పెట్టుబడి పెట్టడంతో పాటు ఆయన్ని వాట్సాప్ బాస్గా ఎంపిక చేయడం విశేషం. ఆ విశేషాలు ఇలా వున్నాయి..
ఫిలాసఫీ స్టూడెంట్ టు టెక్ లీడర్: కునాల్ షా ప్రయాణం చాలా ఆసక్తికరంగా ఉంటుంది. సాధారణంగా టెక్ కంపెనీల అధినేతలు అనగానే ఐఐటీ లేదా ఇంజనీరింగ్ బ్యాక్గ్రౌండ్ ఊహిస్తాం. కానీ కునాల్ షా ముంబైలోని విల్సన్ కాలేజీలో ఫిలాసఫీ లో బీఏ చేశారు. ఇక ఆ తర్వాత ఎంబీఏ లో చేరినప్పటికీ, మధ్యలోనే డ్రాపౌట్ అయ్యారు. చదువు కంటే ప్రాక్టికల్ నాలెడ్జ్, వినియోగదారుల ప్రవర్తనను అర్థం చేసుకోవడంపైనే ఆయన ఎక్కువ శ్రద్ధ పెట్టారు.
ఫ్రీఛార్జ్తో మొదటి సంచలనం: వ్యాపార రంగంలో కునాల్ షాకు గుర్తింపు తెచ్చిన మొదటి స్టార్టప్ ‘ఫ్రీఛార్జ్’ (FreeCharge). 2010లో ఆన్లైన్ మొబైల్ రీఛార్జ్ మరియు డిజిటల్ పేమెంట్స్ ప్లాట్ఫామ్గా దీన్ని ప్రారంభించారు. క్యాష్బ్యాక్ ఆఫర్లతో అప్పట్లో ఇది యువతను విపరీతంగా ఆకట్టుకుంది. ఇక ఆ తర్వాత 2015లో ఈ కంపెనీని ప్రముఖ ఈ-కామర్స్ సంస్థ ‘స్నాప్డీల్’కు దాదాపు 450 మిలియన్ డాలర్లకు (సుమారు రూ.2,800 కోట్లు) విక్రయించి స్టార్టప్ ప్రపంచాన్ని షాక్కు గురిచేశారు.
క్రెడ్తో మరో మైలురాయి: ఫ్రీఛార్జ్ నుండి బయటకు వచ్చిన తర్వాత కునాల్ షా పలు స్టార్టప్లలో ఇన్వెస్టర్గా, సలహాదారుడిగా వ్యవహరించారు. ఆ తర్వాత 2018లో కేవలం 1 మిలియన్ డాలర్ల సొంత పెట్టుబడితో ‘క్రెడ్’ (CRED) సంస్థను స్థాపించారు. ఇక క్రెడిట్ కార్డ్ బిల్లులు సకాలంలో చెల్లించే నమ్మకమైన వినియోగదారులకు రివార్డులు ఇచ్చే కాన్సెప్ట్తో వచ్చిన ఈ యాప్ అతి తక్కువ కాలంలోనే భారతదేశంలోనే అత్యంత విలువైన ఫిన్టెక్ కంపెనీలలో ఒకటిగా ఎదిగింది.
వాట్సాప్లో కునాల్ షా మ్యాజిక్: వాట్సాప్ కేవలం మెసేజింగ్ యాప్గానే కాకుండా.. పేమెంట్స్, బిజినెస్ కామర్స్ మరియు ఆర్టిఫిషియల్ ఇంటెలిజెన్స్ (AI) వైపు అడుగులు వేస్తున్న తరుణంలో కునాల్ షా నియామకం జరిగింది. ఇక కునాల్ షాకు ఉన్న ‘బిల్డర్ మెంటాలిటీ’ గ్లోబల్ విజన్ వాట్సాప్ను తదుపరి స్థాయికి తీసుకెళ్లడానికి ఎంతగానో ఉపయోగపడతాయని మెటా అధినేత మార్క్ జుకర్బర్గ్ స్వయంగా కొనియాడారు.
ఇక భారతదేశంలోనే కాకుండా ప్రపంచవ్యాప్తంగా 300 కోట్లకు పైగా వినియోగదారులు ఉన్న వాట్సాప్ లాంటి నెట్వర్క్ను నడిపించే బాధ్యత ఒక ఇండియన్ ఎంట్రప్రెన్యూర్కు దక్కడం మన దేశ స్టార్టప్ విప్లవానికి దక్కిన గొప్ప గౌరవం. ఇక క్రెడ్ బాధ్యతల నుండి తప్పుకుని కాలిఫోర్నియాలోని మెటా ప్రధాన కార్యాలయం నుండి వాట్సాప్ గ్లోబల్ హెడ్గా కునాల్ షా చేయబోయే కొత్త మ్యాజిక్ కోసం టెక్ ప్రపంచం ఎంతో ఆసక్తిగా ఎదురుచూస్తోంది.
