మనం నడుస్తున్నప్పుడు, పరిగెత్తుతున్నప్పుడు లేదా మెట్లు ఎక్కుతున్నప్పుడు మోకాలి నొప్పి వేధిస్తోందా? మోకాలు వాపు రావడం, ఒక్కసారిగా లాక్ అయినట్లు అయిపోవడాన్ని చాలామంది మామూలు నొప్పే కదా అని లైట్ తీసుకుంటారు. కానీ, ఇది మోకాలి జాయింట్ మధ్యలో ఉండే ‘మెనిస్కస్’ అనే మృదులాస్థి దెబ్బతినడం వల్ల కావచ్చు. దీనినే ‘మెనిస్కస్ టియర్’ అంటారు. ఈ సమస్య ఎందుకు వస్తుంది, దీని లక్షణాలు ఏంటో మనం రోజువారీ మాట్లాడుకునే సింపుల్ భాషలో ఇక్కడ తెలుసుకుందాం.
అసలు మెనిస్కస్ అంటే ఏంటి?: మన మోకాలి జాయింట్ దగ్గర పైన ఉండే తొడ ఎముకకు, కింద ఉండే కాలి ఎముకకు మధ్యలో ‘సి’ (C) ఆకారంలో ఒక మెత్తటి మృదులాస్థి ఉంటుంది. దీనినే మెనిస్కస్ అంటారు. ఇది రెండు ఎముకల మధ్య ఒక కుషన్లా షాక్ అబ్జార్బర్లా పనిచేస్తుంది. మనం నడిచినా, పరుగెత్తినా కాలిపై పడే ఒత్తిడిని ఇది తట్టుకుంటూ మోకాలి కదలికలు సాఫీగా జరిగేలా చూస్తుంది. ఇది దెబ్బతినడాన్నే ‘మెనిస్కస్ టియర్’ అంటారు.
ఈ సమస్య ఎందుకు వస్తుందంటే..?:ముఖ్యమైన కారణాలు చూద్దాం..ఆటలు ఆడేటప్పుడు మోకాలు హఠాత్తుగా మెలితిరగడం. ఇక ప్రమాదాలు జరిగినప్పుడు మోకాలికి బలంగా దెబ్బ తగలడం. అంతేకాక వయసు పెరగడం వల్ల మెనిస్కస్ అరిగిపోయి బలహీనపడటం. ఇక బరువులు ఎత్తేటప్పుడు లేదా మెట్లు ఎక్కేటప్పుడు మోకాలిపై ఎక్కువ ఒత్తిడి పడటం.
ప్రధాన లక్షణాలు ఎలా ఉంటాయి?: మీకు ఈ సమస్య ఉంటే మోకాలిలో నొప్పి, వాపు ఎక్కువగా ఉంటాయి. నడవాలన్నా, మెట్లు ఎక్కాలన్నా చాలా ఇబ్బందిగా అనిపిస్తుంది. ఇక మోకాలిని పూర్తిగా వంచడం లేదా చాచడం అస్సలు కుదరదు. ఇక కొన్నిసార్లు మోకాలు ఒక్కసారిగా లాక్ అయిపోయినట్లు అయిపోతుంది. అలాగే కాలు కదిలించినప్పుడు ‘క్లిక్’ లేదా ‘పాప్’ అనే చిన్న శబ్దాలు వస్తుంటాయి.
నిర్ధారణ మరియు నివారణ జాగ్రత్తలు: సాధారణంగా డాక్టర్లు మీ లక్షణాలను బట్టి, శారీరక పరీక్షలు చేసి ఈ సమస్యను గుర్తిస్తారు. అవసరమైతే ఎమ్మారై (MRI) స్కాన్ ద్వారా దీన్ని కచ్చితంగా నిర్ధారిస్తారు. దీని బారిన పడకుండా ఉండాలంటే వ్యాయామానికి ముందు వార్మప్ చేయాలి. ఇక తొడ, మోకాలి కండరాలు బలంగా మారే ఎక్సర్సైజులు చేయాలి. బరువును అదుపులో ఉంచుకోవాలి మరియు ఆటలు ఆడేటప్పుడు రక్షణ పరికరాలు వాడాలి.
మోకాలి నొప్పిని తొలి దశలోనే గుర్తిస్తే ఆపరేషన్ అవసరం లేకుండానే, కొన్ని ప్రాథమిక జాగ్రత్తలతో సులభంగా కోలుకోవచ్చు. అందుకే నొప్పిని అశ్రద్ధ చేయకుండా సరైన సమయంలో స్పందించడం ముఖ్యం.
గమనిక: మోకాలి నొప్పి కొన్ని రోజుల పాటు తగ్గకపోయినా, వాపు ఎక్కువైనా లేదా నడవడం కష్టంగా అనిపించినా వెంటనే ఆర్థోపెడిక్ నిపుణుడిని సంప్రదించాలి. ఆలస్యం చేస్తే మోకాలి కీళ్లు మరింత పాడయ్యే ప్రమాదం ఉంది.
