సొంతంగా ఏదైనా వ్యాపారం ప్రారంభించాలన్నా లేదా ఉన్న వ్యాపారాన్ని మరింత విస్తరించాలన్నా పెట్టుబడి చాలా అవసరం. చిన్న వ్యాపారులు, నవ పారిశ్రామికవేత్తలను ప్రోత్సహించేందుకు కేంద్ర ప్రభుత్వం ‘ప్రధాన్ మంత్రి ముద్ర యోజన’ (PMMY) పథకాన్ని తీసుకొచ్చింది. ఈ స్కీమ్ ద్వారా ఎలాంటి గ్యారెంటీ లేదా తనఖా లేకుండా గరిష్టంగా రూ.10 లక్షల వరకు రుణం పొందవచ్చు. భారతీయులకు ఆర్థికంగా చేయూతనిచ్చే ఈ ముద్ర లోన్ వివరాలు, ఎలా దరఖాస్తు చేసుకోవాలో ఈ పూర్తి గైడ్లో చూద్దాం..
ముద్ర యోజనలో 3 కేటగిరీల రుణాలు: వ్యాపార అవసరాలను బట్టి ఈ పథకం కింద 3 రకాల లోన్లు అందిస్తారు
శిశు (Shishu): కొత్తగా వ్యాపారం మొదలుపెట్టే వారికి రూ. 50,000 వరకు రుణం ఇస్తారు.
కిశోర్ (Kishor): వ్యాపార విస్తరణ కోసం రూ. 50,001 నుండి రూ. 5 లక్షల వరకు లోన్ పొందవచ్చు.
తరుణ్ (Tarun): పెద్ద మొత్తంలో వ్యాపారాన్ని అభివృద్ధి చేయడానికి రూ. 5,00,001 నుండి రూ. 10 లక్షల వరకు రుణం అందిస్తారు.
రుణానికి ఎవరు అర్హులు?: మాన్యుఫ్యాక్చరింగ్, ట్రేడింగ్, సర్వీసెస్ వంటి వ్యవసాయేతర (Non-Farm) రంగాల్లో చిన్న వ్యాపారాలు చేసే భారతీయ పౌరులందరూ ఈ లోన్ కోసం అర్హులే. ఇక చిన్న దుకాణదారులు, వ్యాపారులు, తయారీదారులు మరియు కొత్తగా బిజినెస్ ఐడియాతో ముందుకు వచ్చేవారు ఈ పథకానికి అప్లై చేసుకోవచ్చు.
రుణం పొందేందుకు ఎలా దరఖాస్తు చేయాలి?: బ్యాంకును సంప్రదించండి సమీపంలోని ప్రభుత్వ, ప్రైవేట్, ప్రాంతీయ గ్రామీణ బ్యాంకులు (RRB) లేదా స్మాల్ ఫైనాన్స్ బ్యాంకులు, NBFC సంస్థలను సంప్రదించాలి.
అప్లికేషన్ ఫారమ్: బ్యాంకులో ముద్ర లోన్ దరఖాస్తు ఫారమ్ను తీసుకుని, మీ వ్యాపార వివరాలతో పూర్తి చేయాలి.
పత్రాల సమర్పణ: గుర్తింపు కార్డు (ఆధార్, పాన్), చిరునామా ప్రమాణపత్రం, వ్యాపార ప్రణాళిక (Business Plan) మరియు పాస్పోర్ట్ సైజ్ ఫోటోలను జతచేయాలి.
రుణ మంజూరు: మీ దరఖాస్తు మరియు వ్యాపార ప్లాన్ను పరిశీలించిన తర్వాత బ్యాంకర్లు రుణాన్ని ఆమోదించి, మొత్తాన్ని మీ ఖాతాలో జమ చేస్తారు. లబ్ధిదారులు తమ వంతుగా 10% మూలధనం సమకూర్చుకుంటే, మిగతా 90% అమౌంట్ను లోన్గా ఇస్తారు.
ఇక ఆర్థిక ఇబ్బందుల వల్ల సొంత వ్యాపార కలను పక్కన పెట్టే వారికి ముద్ర యోజన ఒక గొప్ప అవకాశం. ఎలాంటి పూచీకత్తు లేకుండా లభించే ఈ అవకాశాన్ని ఉపయోగించుకుని సొంత కాళ్లపై నిలబడవచ్చు.
గమనిక: వడ్డీ రేట్లు, ప్రాసెసింగ్ నిబంధనలు మీరు ఎంచుకునే బ్యాంకు లేదా ఫైనాన్షియల్ సంస్థను బట్టి స్వల్పంగా మారే అవకాశం ఉంది. లోన్ అప్లై చేసేముందు సంబంధిత బ్యాంకు నిబంధనలను సరిగ్గా తెలుసుకోండి.
