మన శరీరానికి గాలి తర్వాత అత్యంత కీలకమైంది నీరే! శరీరం నడవాలన్నా, అవయవాలు సరిగ్గా పనిచేయాలన్నా నీరు తప్పనిసరి. మనం తాగే నీటి కంటే శరీరం నుండి బయటకు వెళ్లే నీటి శాతం ఎక్కువైనప్పుడు ‘డీహైడ్రేషన్’ (నిర్జలీకరణ) బారిన పడతాం. శరీరం నీటి కొరతతో ఇబ్బంది పడుతున్నప్పుడు మనకు కొన్ని స్పష్టమైన సంకేతాలు ఇస్తుంది. ఆ 5 ముఖ్యమైన లక్షణాలు ఏంటో ఇప్పుడు తెలుసుకుందాం..
తీవ్రమైన దాహం, పొడిబారిన నోరు: శరీరంలో నీటి శాతం కేవలం 2 శాతం తగ్గినా వెంటనే దాహం వేస్తుంది. దీంతో పాటు నోరు, పెదవులు, చిగుళ్లు, నాసికా రంధ్రాలు బాగా పొడిబారిపోతాయి. ఇక ఇది మీ శరీరానికి నీరు అత్యవసరమని బాడీ ఇచ్చే మొదటి వార్నింగ్ సైన్.
మూత్ర విసర్జన తగ్గడం: ఒంట్లో నీటి కొరత ఏర్పడినప్పుడు మూత్ర విసర్జన గణనీయంగా తగ్గుతుంది. నీరు సరిపడా లేకపోవడం వల్ల మూత్రం రంగు కూడా ముదురు పసుపు రంగులోకి మారుతుంది. ఇక ఇది డీహైడ్రేషన్కు స్పష్టమైన సంకేతం.
తలనొప్పి, విపరీతమైన నీరసం: నీటి శాతం 5 శాతానికి పడిపోతే జ్వరం, తలనొప్పి మొదలవుతాయి. శరీరంలో శక్తి తగ్గిపోయి నిద్ర వస్తున్నట్లు అనిపించడం, రోజంతా తీవ్రమైన అలసటగా ఉండడం జరుగుతుంది.
చర్మంలో సాగే గుణం తగ్గడం: నీటి కొరత పెరిగేకొద్దీ చర్మం తన తేమను, సాగే గుణాన్ని కోల్పోతుంది. చర్మంపై చికాకుగా అనిపించడమే కాకుండా ఎర్రగా మారడం, ఉష్ణోగ్రత పెరిగిపోవడం వంటి మార్పులు కనిపిస్తాయి.
తలతిరగడం, మూర్ఛ రావడం: శరీరంలో నీటి కొరత 5 నుండి 8 శాతానికి చేరితే మైకం రావడం, స్పృహ తప్పి మూర్ఛపోవడం వంటి తీవ్రమైన సమస్యలు వస్తాయి. ఇక ఒకవేళ ఇది 20 శాతానికి చేరితే ప్రాణాలకే ప్రమాదం ఏర్పడుతుంది.
ఎవరికి ప్రమాదం ఎక్కువ?: ఎండలో పనిచేసే కార్మికులు, క్రీడాకారులు, చిన్న పిల్లలు, వృద్ధులు మరియు దీర్ఘకాలిక రోగాలతో బాధపడేవారు త్వరగా డీహైడ్రేషన్కు గురయ్యే అవకాశం ఉంది.
శరీరంలో నీటి కొరత లక్షణాలు కనిపించిన వెంటనే ఓఆర్ఎస్ (ORS) ద్రావణం లేదా ద్రవ పదార్థాలు తీసుకోవడం చాలా మంచిది. దాహం వేసే వరకు ఆగకుండా రోజంతా క్రమం తప్పకుండా తగినన్ని నీళ్లు తాగుతూ ఆరోగ్యంగా ఉండండి.
గమనిక: తీవ్రమైన డీహైడ్రేషన్ లక్షణాలు ఉన్నప్పుడు లేదా పరిస్థితి అదుపు తప్పినట్లు అనిపిస్తే ఆలస్యం చేయకుండా వెంటనే వైద్యుడిని సంప్రదించి చికిత్స తీసుకోవాలి.
