రాత్రిపూట నిద్రలో ఏదో ఒకటి మాట్లాడటం మనలో చాలామందికి అలవాటే. ఉదయం లేచాక పక్కన ఉన్నవాళ్లు చెప్తే తప్ప మనం మాట్లాడామనే విషయమే మనకు తెలియదు. దీన్ని చాలామంది సరదాగా నవ్వుకుని వదిలేస్తుంటారు. వైద్య పరిభాషలో దీన్ని ‘స్లీప్ టాకింగ్ డిజార్డర్’ అంటారు. ఇక అసలు నిద్రలో ఎందుకు మాట్లాడుతారు? దీనికి కారణాలేంటి? తగ్గించుకోవడానికి ఎలాంటి జాగ్రత్తలు తీసుకోవాలో ఇప్పుడు వివరంగా తెలుసుకుందాం..
ఏమిటీ స్లీప్ టాకింగ్ డిజార్డర్?: నిద్రలో తెలియకుండా మాట్లాడడాన్ని ‘స్లీప్ టాకింగ్ డిజార్డర్’ అంటారు. ఒక అధ్యయనం ప్రకారం దాదాపు 66 శాతం మంది ఎప్పుడో ఒకప్పుడు ఈ సమస్యను ఎదుర్కొన్నవారే. అయితే ప్రతీరోజూ కాకుండా కేవలం కొన్ని సందర్భాల్లోనే ప్రజలు నిద్రలో మాట్లాడుతారని నిపుణులు చెబుతున్నారు.
కారణాలు ఏమై ఉంటాయి?: నిద్రలో మాట్లాడటానికి కచ్చితమైన కారణం ఇదేనని చెప్పడానికి ఆధారాలు లేవు. కానీ పగటిపూట మనం గడిపిన సమయం, కలిసిన వ్యక్తులు, మనకు ఎదురైన అనుభవాలే దీనికి ప్రధాన కారణంగా భావిస్తుంటారు. ఇక అలాగే జన్యుపరమైన కారణాలు, పీడకలలు రావడం, యాంటీ డిప్రెసెంట్ మందులు వాడటం వల్ల కూడా నిద్రలో మాట్లాడే అవకాశం ఉంటుంది.
మానసిక సమస్యలతో సంబంధం ఉందా?: డిప్రెషన్, పోస్ట్ ట్రమాటిక్ స్ట్రెస్ డిసార్డర్ (PTSD) వంటి మానసిక ఆరోగ్య సమస్యలు ఉన్నవారిలో స్లీప్ టాకింగ్ ఎక్కువగా కనిపిస్తుందని కొన్ని అధ్యయనాల్లో తేలింది. రాత్రిపూట తీవ్రమైన ఒత్తిడికి గురికావడం కూడా దీనికి ఒక కారణం కావచ్చు.
ప్రమాదకరమా? చిట్కాలేంటి?: నిద్రలో మాట్లాడటం వల్ల శరీరానికి పెద్దగా హాని జరగదు. కానీ పక్కన పడుకునే వారికి మాత్రం ఇది కాస్త ఇబ్బందిగా ఉంటుంది. ఇక దీనిని తగ్గించుకోవడానికి రాత్రివేళల్లో లేట్గా టీవీలు, ఫోన్లు చూడటం మానెయ్యాలి. ముఖ్యంగా హారర్ సినిమాలు చూడకూడదు. ఒత్తిడి తగ్గేందుకు యోగా, మెడిటేషన్ చేయడం మంచిది.
నిద్రలో మాట్లాడటం అనేది సాధారణమైన విషయమే అయినా, సరైన జీవనశైలి పాటించడం ద్వారా దీనిని అదుపులో ఉంచుకోవచ్చు. ఇక ప్రశాంతమైన నిద్ర కోసం ఒత్తిడికి దూరంగా ఉంటూ, మంచి నిద్ర అలవాట్లను అలవర్చుకోవడం చాలా ముఖ్యం.
గమనిక: ఇది సాధారణంగా హాని చేయని సమస్యే అయినప్పటికీ, రోజువారీగా తీవ్రమైన భయంతో లేవడం, నిద్ర లేమి లేదా ఇతర ఆరోగ్య సమస్యలు వేధిస్తుంటే మాత్రం వైద్యులను లేదా నిద్ర నిపుణులను సంప్రదించడం శ్రేయస్కరం.
