నందమూరి బాలకృష్ణ హీరోగా డైరెక్టర్ బాబీ తెరకెక్కిస్తున్న యాక్షన్‌ చిత్రం NBK109 వర్కింగ్ టైటిల్. సితార ఎంటర్‌టైన్‌మెంట్స్‌, ఫార్చ్యూన్‌ ఫోర్‌ సినిమాస్‌, శ్రీకర స్టూడియోస్‌ సంస్థలు సంయుక్తంగా నిర్మిస్తున్న ఈ సినిమాలో బాలయ్యకు జోడీగా సైంధవ్ మూవీ హీరోయిన్ శ్రద్ధా శ్రీనాథ్‌ నటించనున్నట్లు సమాచారం. ఆమె ఇటీవలే ఈ చిత్ర సెట్స్‌లోకి అడుగు పెట్టినట్లు తెలిసింది. ప్రస్తుతం ఈ మూవీ నైట్‌ షెడ్యూల్‌ హైదరాబాద్‌లో జరుగుతోంది. ఇందులో భాగంగా బాలకృష్ణపై ఓ భారీ పోరాట ఘట్టాన్ని చిత్రీకరిస్తున్నారట.
1980ల బ్యాక్ డ్రాప్ నేపథ్యంలో సాగే ఓ ఆసక్తికర కథాంశంతో రూపొందుతున్న ఈ సినిమాలో బాలయ్య రెండు కోణాలున్న పాత్రలో కనిపించనున్నారు. ‘యానిమల్‌’తో మెప్పించిన బాలీవుడ్ స్టార్ బాబీ దియోల్‌ బాలయ్యకు పోటీగా విలన్గా నటిస్తున్నారు. ఈ సినిమా షూటింగ్ ప్రారంభానికి ముందు దసరాకు రిలీజ్ చేయాలని అనుకున్నా ఇప్పుడు ఈ మూవీని మే లేదా జూన్‌ నెలలో విడుదల చేయాలని మేకర్స్ భావిస్తున్నట్టు సమాచారం. ఈ చిత్రంలో శ్రద్ధాతో పాటు ఇంకో హీరోయిన్ కూడా ఉండనున్నట్లు సమాచారం.
