టాలీవుడ్ యంగ్ హీరో శర్వానంద్కు గత కొంత కాలం క్రితం నిశ్చితార్థం చేసుకున్న విషయం తెలిసిందే. అయితే ఆయన నిశ్చితార్థం గురించి ఫుల్ ఖుష్ అయిన ఫ్యాన్స్ పెళ్లి ఎప్పుడెప్పుడు జరుగుతుందా అని ఆసక్తితో ఎదురుచూశారు. నెలలు గడిచినా పెళ్లి మాట రాకపోయేసరికి కాస్త నిరాశ చెందారు. ఈ క్రమంలోనే సోషల్ మీడియాలో శర్వానంద్ పెళ్లి క్యాన్సిల్ అంటూ వస్తున్న వార్తలు చూసి ఏం జరిగిందోనని ఆందోళన చెందారు. అయితే ఆ వార్తలన్నీ పుకార్లేనని తాజాగా తెలిసింది.
హీరో శర్వానంద్ పెళ్లి డేట్ ఫిక్స్ అయింది. రాజస్థాన్‌లోని జైపుర్‌లో ఉన్న లీలా ప్యాలెస్‌ వీరి వివాహానికి వేదిక కానుంది. జూన్‌ 2, 3 తేదీల్లో గ్రాండ్‌గా వివాహ వేడుకలను నిర్వహించనున్నట్లు కుటుంబ సభ్యులు తెలిపారు. ఇక ఈ వెడ్డింగ్‌కు స్నేహితులు, ఇండస్ట్రీలోని సినీ ప్రముఖులకు ఆహ్వానం అందనున్నట్లు సమాచారం. పెళ్లి తేదీలను ఖరారు చేయడంతో ప్రస్తుతం సోషల్ మీడియాలో ఈ యంగ్ హీరో పేరు ట్రెండ్‌ అవుతోంది. కాబోయే వధూవరులకు నెటిజన్లు శుభాకాంక్షలు చెబుతున్నారు. శర్వానంద్, రక్షితా రెడ్డిల నిశ్చితార్థం ఈ ఏడాది ప్రారంభంలో అంగరంగ వైభవంగా జరిగిన విషయం తెలిసిందే.
