నాగుల చవితి వచ్చిందంటే, పాము పుట్టలో పాలు పోయడం మన కళ్ళ ముందు మెదిలే దృశ్యం ఇదే. తరతరాలుగా వస్తున్న ఈ ఆచారం వెనుక నిజంగా పాములకు ఆహారం అందించాలనే ఉద్దేశం ఉందా? లేక మన పెద్దలు దీనిలో ఏదైనా లోతైన శాస్త్ర రహస్యం దాచి ఉంచారా? మన నమ్మకాలతో పాటు ఆరోగ్యం, ఆధ్యాత్మికతకు ముడిపడిన ఈ ఆచారంలోని అద్భుత రహస్యాన్ని తెలుసుకుందాం..
పుట్టలో పాలు, కేవలం నమ్మకం కాదు: నాగుల చవితి రోజున పుట్టలో పాలు పోయడం కేవలం ఆచారం మాత్రమే కాదు, దీని వెనుక ఒక వేదాంత రహస్యం ఉందని పండితులు చెబుతున్నారు. యోగ శాస్త్రం ప్రకారం, మానవ శరీరంలోని వెన్నెముకను ‘వెన్నుపాము’గా, అందులోని కుండలినీ శక్తిని పాము ఆకారంలో మూలాధార చక్రంలో ఉంటుందని చెబుతారు. పాము అంటే రజో, తమో గుణాలకు ప్రతీక అని, పాలు సత్వగుణాన్ని సూచిస్తాయని చెబుతారు. పుట్టలో పాలు పోయడం ద్వారా, మనలోని ఈర్ష్య, కోపం వంటి తమో గుణాలు తొలగిపోయి, మంచి గుణాలు (సత్వగుణం) పెరుగుతాయని ఈ ఆచారంలోని ఆధ్యాత్మిక అంతరార్థం.
పుట్ట మట్టి, ఆరోగ్యం, ఆచారంలో దాగి ఉన్న సైన్స్: పాలు పోయడం వెనుక కొన్ని శాస్త్రీయ కారణాలు కూడా ఉన్నాయి. పుట్టను చెదపురుగులు, చీమలు నిర్మించేటప్పుడు వాటి నోటి నుంచి సుక్రోజ్ అనే పదార్థం విడుదల అవుతుంది. పండుగ రోజున పాలు పోసినప్పుడు, ఆ మట్టి తడిసి, ఆ సుక్రోజ్ గాలిలో కలిసి ప్రత్యేకమైన సువాసన వస్తుంది. ఈ గాలి పీల్చడం వలన ముఖ్యంగా సంతానం లేని మహిళల్లో సంతాన సంబంధిత దోషాలు, సమస్యలు తొలగిపోతాయని, ఆరోగ్యం చేకూరుతుందని చెబుతారు. అందుకే పూజ తర్వాత పుట్ట మట్టిని నుదుటిపై, చెవులకు పెట్టుకునే సంప్రదాయం కూడా ఉంది, దీని వలన వినికిడి సమస్యలు రావని నమ్ముతారు.
మొత్తంగా నాగుల చవితి రోజున పుట్టకు పూజ చేయడం, పాలు పోయడం అనేది కేవలం నాగదేవతను ప్రసన్నం చేసుకోవడం కోసమే కాకుండా, మన అంతర్గత శుద్ధికి, ఆరోగ్యాన్ని మెరుగుపరుచుకోవడానికి మన పెద్దలు పెట్టిన అద్భుతమైన మార్గం.
గమనిక: నిజానికి, పాములు సరీసృపాలు కాబట్టి, వాటికి పాలు జీర్ణం కావు. అందువలన పుట్టలో ఎక్కువ పాలు పోయడం వలన పాములకు హాని కలగవచ్చు. పాములకు బదులుగా, పుట్ట దగ్గర మట్టి పాత్రలో కొద్దిగా పాలు ఉంచడం లేదా దేవాలయాల్లోని నాగ ప్రతిమలకు పాలాభిషేకం చేయడం శ్రేయస్కరం. సంప్రదాయాన్ని పాటిస్తూనే, జీవరాశికి మేలు చేకూర్చే విధంగా ఆచరించడం ఉత్తమం.
