శిశువులకు డైపర్స్ వాడకం ఆధునిక జీవితంలో ఒక అనివార్య భాగమైపోయింది. ఇది సౌలభ్యాన్ని అందిస్తున్నప్పటికీ, దీని వల్ల శిశువుకు కలిగే లాభాలు, నష్టాల గురించి చర్చ ఎప్పుడూ ఉంటుంది. “డైపర్స్” అనేది ఆధునిక తల్లిదండ్రులకు ఈజీ పనిగా మారింది. పసి పిల్లలకు డైపర్స్ వేయడం వల్ల ప్రయాణాలలో, రాత్రిపూట నిద్రకు భంగం లేకుండా ఉంటుంది. అయితే, దీని వల్ల శిశువు చర్మంపై రాషెస్, చికాకు వంటి సమస్యలు కూడా తలెత్తుతాయి. మరి డైపర్లు వాడటం వల్ల కలిగే లాభాలు, నష్టాలను, అలాగే పూర్వ కాలంలో ఉపయోగించిన పద్ధతులను తెలుసుకుందాం ..
డైపర్ వాడకం వల్ల లాభాలు: ప్రయాణాల్లో, బయటి పనుల్లో డైపర్స్ చాలా సౌలభ్యాన్ని అందిస్తాయి. పసి పిల్లలు ఎక్కడ పడితే అక్కడ మూత్రం పోయకుండా, ఇబ్బందులు లేకుండా చూసుకోవచ్చు. పసిపిల్లల శరీరం, బట్టలు శుభ్రంగా ఉంటాయి. ఇది తల్లిదండ్రుల పని భారాన్ని తగ్గిస్తుంది. రాత్రిపూట శిశువుకు డైపర్ వేస్తే, మూత్రం వల్ల నిద్రకు భంగం కలగదు. దీనివల్ల శిశువు, తల్లిదండ్రులు ఇద్దరూ ప్రశాంతంగా నిద్రపోవచ్చు.
డైపర్ వాడకం వల్ల నష్టాలు: డైపర్ రాషెస్ వస్తాయి. డైపర్లు ఎక్కువసేపు తడిగా ఉండడం వల్ల శిశువు చర్మంపై ఎర్రటి దద్దుర్లు, దురద వచ్చే అవకాశం ఉంది. ఇది చర్మానికి చికాకును కలిగిస్తుంది.ఇక డైపర్లు నిరంతరంగా కొనుగోలు చేయాలి, ఇది తల్లిదండ్రులకు ఆర్థిక భారం. వాడిన డైపర్లు భూమిలో కలవడానికి చాలా సంవత్సరాలు పడుతుంది. ఇది పర్యావరణానికి హానికరం.
పూర్వం వాడిన పద్ధతులు: డైపర్ల వాడకం లేని కాలంలో, పూర్వం మన పెద్దవారు కొన్ని సాంప్రదాయ పద్ధతులను పాటించేవారు. పాత నూలు చీరలు, కాటన్ బట్టలను ముక్కలుగా చేసి, వాటిని శిశువులకు ఉపయోగించేవారు. ఇవి చర్మానికి మంచివి, వాటిని శుభ్రం చేసి మళ్ళీ వాడుకోవచ్చు. చిన్ననాటి నుంచే శిశువులకు మల మూత్ర విసర్జన శిక్షణ ఇచ్చేవారు. దీనివల్ల డైపర్ల అవసరం ఉండేది కాదు.
డైపర్ వేయడం వల్ల కలిగే లాభాలు, నష్టాలను బట్టి ఒక సమతుల్యమైన నిర్ణయం తీసుకోవాలి. డైపర్లు తప్పనిసరి అయినప్పుడు (ప్రయాణాల్లో, రాత్రిపూట) మాత్రమే వాడి, మిగిలిన సమయాల్లో వాటిని మానుకోవడానికి ప్రయత్నించవచ్చు. శిశువుకు డైపర్ వేసేటప్పుడు, ప్రతి 2-3 గంటలకు ఒకసారి మార్చడం, డైపర్ రాషెస్ రాకుండా క్రీమ్‌లు వాడడం చాలా ముఖ్యం.
గమనిక: ప్రతి శిశువు చర్మం వేరుగా ఉంటుంది. మీ శిశువు చర్మం సున్నితంగా ఉంటే, డైపర్ల బదులు పాత పత్తి బట్టలు వాడడం మంచిది. మీ శిశువుకు చర్మ సమస్యలు ఉంటే, వైద్యుడిని సంప్రదించి తగిన సలహా తీసుకోవాలి.
