ధూమపానాన్ని అంతం చేయడంలో ఏ దేశాలు ముందున్నాయి..?

ధూమపానం చేసేవారికి మాత్రమే ధూమపానం ప్రమాదం అని సాధారణంగా ప్రజలు నమ్ముతారు. కానీ అది అలా కాదు. ప్రపంచ ఆరోగ్య సంస్థ (WHO) నివేదిక ప్రకారం, ధూమపానం వల్ల ప్రతి సంవత్సరం 80 లక్షల మందికి పైగా మరణిస్తున్నారు. వీరిలో 13 లక్షల మంది తమంతట తాముగా పొగతాగని వారు అయితే సెకండ్ హ్యాండ్ పొగకు గురికావడం వల్ల వారి ఆరోగ్యం క్షీణిస్తుంది. ధూమపానం వల్ల కలిగే ప్రమాదాలను దృష్టిలో ఉంచుకుని, చాలా దేశాలు కఠినమైన చట్టాలను ఆమోదించాయి. ధూమపానానికి సంబంధించి కఠినమైన చట్టాలు ఉన్న అగ్ర దేశాల గురించి తెలుసుకుందాం.

సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (CDC) ప్రకారం.. సిగరెట్ తాగడం వల్ల శరీరంలోని దాదాపు అన్ని అవయవాలకు హాని కలుగుతుంది. పొగతాగే అలవాటు వల్ల శ్వాస తీసుకోవడంలో ఇబ్బంది ఏర్పడి ప్రాణాంతకమైన క్యాన్సర్ వచ్చే ప్రమాదం ఉంది.

ఐర్లాండ్

మార్చి 29, 2004న, ఐర్లాండ్ పని ప్రదేశాలలో ఇండోర్ స్మోకింగ్‌ను పూర్తిగా నిషేధించిన ప్రపంచంలోనే మొదటి దేశంగా అవతరించింది. ఇది కేవలం కార్యాలయానికే పరిమితం కాలేదు. రెస్టారెంట్లు మరియు వినోద వేదికలు కూడా చట్టం పరిధిలోకి వచ్చాయి. ప్రారంభంలో ఐరిష్ ప్రభుత్వం తెచ్చిన ఈ చట్టాన్ని ఎంతో మంది విమర్శించారు. కానీ దాని ప్రయోజనాలను చూసిన తర్వాత, ప్రపంచవ్యాప్తంగా ఉన్న దేశాలు ఈ విధానాలను అనుకరించాయి.

పోర్చుగల్

పోర్చుగల్ 2040 నాటికి ‘పొగ రహిత తరం’ని సృష్టించాలని లక్ష్యంగా పెట్టుకుంది. గత సంవత్సరం, అక్కడ పార్లమెంటులో బిల్లు పెట్టారు. చట్టంగా మారిన తర్వాత, పాఠశాలలు, విశ్వవిద్యాలయాలు, ఆసుపత్రులు లేదా పబ్లిక్ భవనాలు, రెస్టారెంట్లు, బార్‌ల వంటి క్రీడా వేదికల వెలుపల ధూమపానం నిషేధించబడింది. చట్టం ప్రకారం, 2025 నుండి, లైసెన్స్ పొందిన విమానాశ్రయ దుకాణాలు మాత్రమే సిగరెట్లు మరియు ఇతర పొగాకు ఉత్పత్తులను విక్రయించడానికి అనుమతించబడతాయి. దీని అర్థం వెండింగ్ మెషీన్లు, బార్లు, రెస్టారెంట్లు మరియు పెట్రోల్ బంకులు ఇకపై వాటిని విక్రయించడానికి అనుమతించబడవు. 2030 తర్వాత, రెస్టారెంట్లు, బార్‌లు మరియు నైట్‌క్లబ్‌లలో వేర్వేరు స్మోకింగ్ ప్రాంతాలు కూడా చట్టవిరుద్ధం కానున్నాయి.

కెనడా

కెనడా లక్ష్యం 2035 నాటికి దేశంలో పొగాకు వినియోగాన్ని 5% కంటే తక్కువకు తగ్గించడం. దీనిని సాధించడానికి, కెనడా ప్రభుత్వం వివిధ రకాల ప్రణాళికలను పరిశీలిస్తోంది. నివేదిక ప్రకారం, యువత ధూమపానం మానేయాలని ప్రోత్సహించడానికి ప్రతి సిగరెట్‌పై హెచ్చరికలను ముద్రించడం ప్రారంభించిన మొదటి దేశం కెనడా. ఏప్రిల్ 2025 నాటికి, అన్ని సైజుల సిగరెట్‌లపై ఈ హెచ్చరిక రాయడం తప్పనిసరి. ప్రజలు, ముఖ్యంగా యువత ధూమపానం నుంచి అరికట్టడంలో ఈ చర్య విజయవంతం అవుతుందని పరిపాలన భావిస్తోంది.

ఆస్ట్రేలియా

ఆస్ట్రేలియాలో పాఠశాలలు, కార్యాలయ భవనాలు, షాపింగ్ మాల్స్, విమానాశ్రయాలు వంటి బహిరంగ ప్రదేశాల్లో ధూమపానం చట్టవిరుద్ధం. దేశంలో పొగ రహిత చట్టాలకు రాష్ట్ర, ప్రాదేశిక ప్రభుత్వాలు ప్రాథమికంగా బాధ్యత వహిస్తాయి. వారి స్థాయిలో వారు సెకండ్ హ్యాండ్ పొగ నుంచి ప్రజలను రక్షించే చట్టాలను తీసుకువస్తారు. ధూమపానం మానేయమని ప్రజలను ప్రోత్సహిస్తారు. ఆస్ట్రేలియన్ ప్రభుత్వం పొగాకు ఉత్పత్తులపై పన్నులు విధిస్తుంది.

యునైటెడ్ కింగ్‌డమ్

యునైటెడ్ కింగ్‌డమ్‌లో ప్రధాన మంత్రి రిషి సునక్ జనవరి 1, 2009 తర్వాత జన్మించిన వ్యక్తులు ఇంగ్లాండ్‌లో సిగరెట్లను కొనుగోలు చేయకుండా నిరోధించే కొత్త చట్టాన్ని ప్రవేశపెట్టాలని ఆలోచిస్తున్నారు. ఈ తేదీ తర్వాత పుట్టిన వారికి సిగరెట్ లేదా పొగాకు అమ్మడం చట్టవిరుద్ధం. దీంతో 2040 నాటికి యువతలో పొగతాగడం దాదాపు పూర్తిగా తొలగిపోతుందని ప్రభుత్వం పేర్కొంది. ఇలాంటి కఠిమైన చట్టాలు ఇండియాలో కూడా తీసుకువస్తే.. ఎంతో బాగుంటుంది.