రాష్ట్రంలో కొలువుదీరిన కొత్త ప్రభుత్వానికి కనీసం సంవత్సరం అయినా సమయం ఇవ్వాలని.. అన్నప్రాశన రోజే ఆవకాయ పెట్టినట్లుగా కొందరి వైఖరి ఉందని సీపీఐ ఎమ్మెల్యే కూనంనేని సాంబశివరావు అన్నారు.శనివారం అసెంబ్లీలో కూనంనేని సాంబశివరావు మాట్లాడుతూ.. ఏ ప్రభుత్వమైనా అధికారంలోకి వచ్చాక కోలుకోవడానికి కొంత సమయం పడుతుందని.. ఆరు నెలలకే అన్నీ చేయలేదు అనడం సరికాదని బీఆర్ఎస్ ప్రభుత్వం పై మండిపడ్డారు. గత బీఆర్ఎస్ ప్రభుత్వం చేసిన తప్పులను ఈ ప్రభుత్వం చేయకుండా జాగ్రత్త పడాలని, అలాగే కొనసాగుతుందని పేర్కొన్నారు.
తమపై నమ్మకంతో ఓట్లు వేసి గెలిపించిన ప్రజలకు మేలు చేయాలనే ప్రభుత్వం భావిస్తుందని ఆయన అన్నారు. గత బీఆర్ఎస్ ప్రభుత్వం రూ.7 లక్షల కోట్ల అప్పులు చేసిందని విమర్శించారు. ఆ అప్పు తీర్చడానికి మరో అప్పు చేయాల్సిన పరిస్థితిలో రాష్ట్ర ప్రభుత్వం ఉందని..ఇదే సమయంలో అప్పులు ఉన్నాయి కాబట్టి హామీలు నెరవేర్చలేం అనడం కూడా సరికాదని ప్రభుత్వ పెద్దలకు ఆయన హితవు పలికారు.
