సాయంత్రం పూట కాస్త టైమ్పాస్ అవ్వాలన్నా లేదా తేలికపాటి స్నాక్స్ తినాలన్నా మనకు వెంటనే గుర్తొచ్చేవి మరమరాలు. వీటిని బొరుగులు పేలాలు అని కూడా పిలుస్తారు. వేల ఏళ్ల చరిత్ర ఉన్న ఈ మరమరాలు కేవలం రుచి మాత్రమే కాదు మన ఆరోగ్యానికి ఎన్నో రకాలుగా మేలు చేస్తాయి. అరుగుదలకు ఎంతో మంచివైన ఈ మరమరాల వల్ల కలిగే ఆ ఐదు అద్భుత ప్రయోజనాలు ఏంటో వీటితో ఎలాంటి వంటలు చేసుకోవచ్చో ఇప్పుడు సింపుల్గా తెలుసుకుందాం..
సులభంగా అరుగుతాయి.. పొట్ట ఫ్రీ: ధాన్యపు గింజలను వేడి చేయడం వల్ల వాటి స్వభావం మారిపోతుంది. అందుకే మామూలు అన్నం బియ్యం కంటే ఈ మరమరాలు చాలా తేలికగా జీర్ణమవుతాయి. ఇక రుగ్వేద కాలంలో ‘లాజ’ అని పిలిచే ఈ పేలాలు.. పొట్టలో ఎలాంటి బరువు లేకుండా చూస్తాయి. జీర్ణవ్యవస్థను చురుగ్గా మార్చడంలో ఇవి చాలా బాగా సహాయపడతాయి.
ఎసిడిటీ, వడదెబ్బ నుంచి ఉపశమనం: వేసవిలో వడదెబ్బ తగిలినా లేదా ఎసిడిటీ, కడుపులో మంట, అతిసారం, జ్వరం వంటి సమస్యలు వేధిస్తున్నప్పుడు మరమరాలు అద్భుతంగా పనిచేస్తాయి. ఇక చిక్కటి మజ్జిగలో మరమరాల పిండిని నానబెట్టి, అందులో కొద్దిగా జీలకర్ర, కొత్తిమీర వేసుకుని తింటే కడుపు చల్లబడి, తక్షణ శక్తి లభిస్తుంది.
ఇన్స్టంట్ హెల్తీ బ్రేక్ఫాస్ట్: ఉరుకుల పరుగుల జీవితంలో పొయ్యి వెలిగించే టైమ్ లేనప్పుడు మరమరాలతో తక్షణ ఉప్మా చేసుకోవచ్చు. అలాగే నానబెట్టిన మరమరాల ముద్ద, గోధుమరవ్వ, టమాటా, అల్లం కలిపి అట్లు వేసుకోవచ్చు. ఇక ఇవి మినప రొట్టెల కంటే చాలా తేలికగా అరిగి, శరీరానికి మంచి పోషకాలను అందిస్తాయి.
అన్ని వయసుల వారికి బెస్ట్ స్నాక్: కేవలం బియ్యమే కాదు.. జొన్నలు, బార్లీ, మొక్కజొన్నలు, నేటి చిరుధాన్యాలు (మిల్లెట్స్) అన్నింటితోనూ పేలాలు తయారుచేసుకోవచ్చు. ఇక పాతతరం వాళ్లు వీటిని బెల్లం లేదా తేనెతో కలిపి గుళికల్లా తినేవారు. తీపి ఇష్టం లేని వారు కాస్త పసుపు, ఉప్పు, కారం చల్లుకుని హెల్తీ స్నాక్గా ఎంజాయ్ చేయవచ్చు.
బొంబాయి రవ్వతో పరిమళభరిత రవ్వట్టు: మరమరాలు బొంబాయి రవ్వ, ఉల్లిపాయ, పచ్చిమిర్చి, పెరుగు, జీలకర్ర కలిపి చేసుకునే రవ్వట్టు ఎంతో మృదువుగా సువాసన భరితంగా ఉంటుంది. ఇక ఇది నాలుకకు రుచితో పాటు శరీరానికి తక్కువ క్యాలరీలను అందిస్తుంది. బరువు తగ్గాలనుకునే వారికి కూడా ఇది ఒక మంచి లైట్ ఫుడ్.
ఇక మరమరాలు మన సాంప్రదాయ ఆహారంలో ఒక గొప్ప భాగం. వీటిని రోజువారీ ఈవినింగ్ స్నాక్స్గా లేదా బ్రేక్ఫాస్ట్గా మార్చుకోవడం ద్వారా ఎంతో హాయిగా, ఆరోగ్యంగా ఉండవచ్చు.
గమనిక: ఆయుర్వేద గ్రంథమైన ‘భావప్రకాశం’ ప్రకారం, మరమరాల పిండిని (పేలపిండి) ఎట్టి పరిస్థితుల్లోనూ మాంసాహారంతో కలిపి తీసుకోకూడదు. ఇది విరుద్ధ ఆహారం కనుక ఆరోగ్యానికి హాని కలిగించవచ్చు.
