‘బాబు ష్యూరిటీ-భవిష్యత్‌కు గ్యారెంటీ’ నేటి నుంచి ప్రారంభం కానుంది. ఈ మేరకు ‘బాబు ష్యూరిటీ – భవిష్యత్తుకు గ్యారెంటీ’ కార్యక్రమంపై ప్రజలకు టీడీపీ అధినేత చంద్రబాబు బహిరంగ లేఖ రాశారు. ‘బాబు ష్యూరిటీ – భవిష్యత్తుకు గ్యారెంటీ’ పై రేపటి నుంచి 45 రోజుల పాటు ఆంధ్ర ప్రదేశ్‌ రాష్ట్ర వ్యాప్త ప్రచార కార్యక్రమానికి శ్రీకారం చుట్టింది టీడీపీ పార్టీ.
టీడీపీ పార్టీ కార్యకర్తలు, నేతలు 3 కోట్ల మందిని కలిసే కార్యక్రమంలో ప్రజల సహకారం, భాగస్వామ్యం కోరుతూ ఆంధ్ర ప్రదేశ్‌ రాష్ట్ర ప్రజలకు లేఖ రాశారు చంద్రబాబు. తెలుగుదేశం పార్టీ చిహ్నమైన సైకిల్ రెండు చక్రాల్లో ఒకటి సంక్షేమానికి, మరొకటి అభివృద్ధికి ప్రతీక అని.. 2014-19 మధ్య రెండంకెల వృద్ధితో ప్రతి రంగంలో దేశంలో అగ్రగామిగా ఉన్న నవ్యాంధ్రను నేటి పాలకులు నాలుగున్నరేళ్లలో సర్వ నాశనం చేశారని బహిరంగ లేఖలో చంద్రబాబు పేర్కొన్నారు. నాడు అద్భుతంగా పురోగమించిన రాష్ట్రం.. నేడు అధ:పాతాళానికి పడిపోయిందని.. భస్మాసుర పాలనలో అన్ని వర్గాల ప్రజలు అల్లాడిపోతున్నారని ఆగ్రహించారు.
