కొత్తగా కారు కొన్నాడు ఓ యువకుడు. ఈ సందర్భంగా తన స్నేహితులకు పార్టీ ఇచ్చేందుకు అదే కారులో వారితో కలిసి బయటకు వెళ్లాడు. డిన్నర్ చేసి తిరిగి పయనమయ్యారు వాళ్లంతా. ఈ క్రమంలో కారు అదుపుతప్పి చెట్టును ఢీ కొట్టింది. ఈ ఘటనలో కారు నడుపుతున్న వ్యక్తితో పాటు మరో ఇద్దరు అక్కడికక్కడే మృతి చెందారు. మరో వ్యక్తి గాయపడ్డాడు. ఈ ఘటన అనంతపురం జిల్లాలో ఇవాళ తెల్లవారుజామున చోటుచేసుకుంది.
‘తాడిపత్రికి చెందిన మోహన్‌ రెడ్డి ఇటీవల కారు కొనుగోలు చేశాడు. ఈ సందర్భంగా తన స్నేహితులకు శుక్రవారం రాత్రి విందు ఇచ్చాడు. విందు అనంతరం తిరిగి వస్తుండగా కారు అదుపుతప్పి చెట్టుకు ఢీ కొట్టింది. ఈ ప్రమాదంలో కారు నడుపుతున్న మోహన్‌రెడ్డితో పాటు విష్ణువర్ధన్‌, నరేశ్‌ రెడ్డి అక్కడికక్కడే మృతి చెందారు. మరో యువకుడు శ్రీనివాసరెడ్డి గాయపడ్డాడు.’ అని పోలీసులు తెలిపారు. మృతదేహాలను ప్రభుత్వాసుపత్రికి తరలించినట్లు ఎస్సై మహమ్మద్‌ గౌస్‌ వెల్లడించారు. మద్యం మత్తు, అతివేగమే ప్రమాదానికి కారణమని పోలీసులు ప్రాథమికంగా అంచనా వేశారు.
