ఈరోజుల్లో కిడ్నాప్ చాలా కామనైపోయింది. అలాంటి కిడ్నాప్ కేసు పట్టుకోవాలంటే పోలీసులు కూడా చాలా యాక్టివ్ గా ఉండాలి. కృష్ణా జిల్లా పోలీసులు అదే చేశారు. ఓ కిడ్నాప్ కోసం ఏకంగా విమానం ఎక్కేశారు.. కిడ్నాపర్ల కోసం ఏకంగా ఫ్లైట్ బుక్ చేసుకుని మరీ ఛేజ్ చేశారు. మొత్తానికి కిడ్నాపర్లను పట్టుకున్నాడు..
అసలు విషయం ఏంటంటే.. కృష్ణా జిల్లా ఆత్కూరు వద్ద కిడ్నాప్ కు గురైన 8 నెలల బాలుడి కేసును పోలీసులు విజయవంతంగా చేధించారు. ఈ కేసును వివిధ కోణాల్లో సమగ్రంగా దర్యాప్తు చేయడం ద్వారా బాలుడిని అపహరించిన నిందితులను పట్టుకున్నట్లు విజయవాడ డీసీపీ హర్షవర్ధన్ రాజు వెల్లడించారు.
రాజస్థాన్ కు చెందిన పూలుబాయ్, సోను నగరంలో నివాసం ఉంటూ ఆత్కూరు పరిధిలోని పొట్టిపాడు వద్ద చిరు వ్యాపారం చేసుకుంటూ జీవిస్తున్నారు. కొన్ని రోజుల క్రితం రాజస్థాన్ నుంచి వచ్చిన చాను, మాయ వద్ద నుంచి పూలుబాయ్ 36 వేల రూపాయలు అప్పు తీసుకున్నాడు. ఆ డబ్బులు తిరిగి చెల్లించే క్రమంలో ఇద్దరికీ గొడవైంది.
ఈ క్రమంలోనే చాను, మాయ పూలుభాయ్ చిన్నోడు 8 నెలల బాలుడిని కిడ్నాప్ చేశారు. ఆ తర్వాత రాజస్థాన్ కు పారిపోయారు. బాలుడి తల్లిదండ్రుల ఫిర్యాదు మేరకు పోలీసులు రంగంలోకి దిగారు. ఆత్కూరు, గన్నవరం పోలీసులు కేసు నమోదు చేసుకుని దర్యాప్తు ప్రారంభించారు.
నిందితులు బాలుడిని అపహరించిన అనంతరం ఈ నెల 16న రాజస్థాన్ పారిపోయినట్టు తెలుసుకున్నారు. వెంటనే ప్రత్యేక విమానంలో నిందితుల కంటే ముందే రాజస్థాన్ కు వెళ్లారు. అక్కడి పోలీసులను అప్రమత్తం చేయడం ద్వారా వారి ఆచూకీ కనుగొన్నారు. అక్కడి నుంచి నిందితులను రైలులో విజయవాడ తీసుకువచ్చారు. సూపర్ క్రైమ్ స్టోరీ కదూ.
