తెలంగాణలో బిజెపి జాగ్రత్తగా అడుగులు వేసుకుంటూ ముందుకు వెళ్తోంది. తమ ప్రధాన రాజకీయ ప్రత్యర్థి టిఆర్ఎస్ ను బలహీనం చేసే అన్ని విషయాల పైన దృష్టి పెట్టి బలం పెంచుకునేందుకు ఒక ప్రణాళికతో ముందుకు వెళుతోంది ఏ ఏ అంశాల ద్వారా టిఆర్ఎస్ పై చేయి సాధించిందో అవే అంశాలను టార్గెట్ చేసుకుని టిఆర్ఎస్ కు పట్టు దొరక్కుండా, బలహీనం చేయాలనే విధంగా ప్రయత్నాలు చేస్తోంది. దానిలో భాగంగానే తెలంగాణ ఉద్యోగ సంఘాల నాయకులను తెలంగాణ బిజెపి అధ్యక్షుడు బండి సంజయ్ టార్గెట్ చేసుకుంటూ పెద్ద ఎత్తున విమర్శలు చేస్తున్న తీరు దీనికి నిదర్శనంగా కనిపిస్తోంది. బండి సంజయ్ వ్యాఖ్యలు టీఎన్జీవో నేతల్లోనూ రాజకీయ వర్గాలలోనూ తీవ్ర స్థాయిలో చర్చ జరుగుతోంది. టీఆర్ఎస్, ఎంఐఎం పార్టీలపై ఏవిధంగా విమర్శలు చేస్తున్నారో, టీ ఎన్జీవో నేతల పైన సంజయ్ అదే విధంగా విమర్శలు చేస్తున్నారు .
మామూలుగా అయితే ఉద్యోగ సంఘాల మద్దతు కోసం అన్ని పార్టీలు గట్టిగా ప్రయత్నం చేస్తుంటాయి. కానీ దానికి భిన్నంగా ఇప్పుడు బిజెపి వ్యవహరిస్తుండడం పై ఉద్యోగ సంఘాలలో చర్చ జరుగుతోంది. అయితే గతంలో టీఎన్జీవో రాష్ట్ర అధ్యక్షుడిగా పనిచేసిన స్వామిగౌడ్ బిజెపిలో చేరడం తో ఇప్పుడు టిఎన్జీవో సంఘం లో చీలిక తెచ్చే విధంగా బిజెపి ప్రయత్నాలు చేస్తున్నట్లుగా కనిపిస్తోంది. స్వామి గౌడ్ తో పాటు , ఉద్యోగ సంఘానికి చెందిన మరో మాజీ నేత తో కలిసి ఉద్యోగ సంఘాలలో చీలిక తీసుకువచ్చి, బీజేపీకి మద్దతు లభించే విధంగా ప్రయత్నాలు చేస్తున్నట్లు సమాచారం. అది కాకుండా తెలంగాణ ప్రభుత్వం ఉద్యోగుల డిమాండ్లను పట్టించుకోవడంలేదని, అలాగే టీఎన్జీవో నేతలు ప్రభుత్వం దగ్గర ఉద్యోగ సమస్యలను ప్రస్తావించి పరిష్కార మార్గం చూపించడంలో విఫలమవుతున్నారని చాలా కాలంగా ఉద్యోగుల్లో ఆగ్రహం ఉండటంతోనే ఇప్పుడు ఆ సంఘాలలో చీలిక తెచ్చి ఉద్యోగుల మద్దతు బీజేపీకి ఉండేవిధంగా సంజయ్ ప్లాన్ చేస్తున్నట్లు గా విశ్వసనీయ వర్గాల ద్వారా తెలుస్తోంది.
