దేశంలో ప‌బ్‌జి pubg నిషేధం అయిన‌ప్ప‌టి నుంచి ఆ గేమ్ ప్రియులు మళ్లీ ఆ గేమ్ వ‌స్తుందా, రాదా అని ఎంతో ఆస‌క్తిగా ఎదురు చూశారు. వారి ఆస‌క్తికి ఎట్ట‌కేల‌కు తెర‌ప‌డింది. బ్యాటిల్ గ్రౌండ్స్ గేమ్‌ను అధికారికంగా లాంచ్ చేశారు. ఇటీవ‌లే ఈ గేమ్‌కు చెందిన బీటా వెర్ష‌న్‌ను లాంచ్ చేయ‌గా, ఇప్పుడు ఈ గేమ్ అఫిషియ‌ల్‌గా విడుద‌లైంది. గూగుల్ ప్లే స్టోర్‌లో ఆండ్రాయిడ్ యూజ‌ర్లు ఈ గేమ్‌ను డౌన్‌లోడ్ చేసుకోవ‌చ్చు.
ఇప్ప‌టికే బీటా వెర్షన్ వాడుతున్న‌వారు గేమ్‌ను లేటెస్ట్ వెర్ష‌న్‌కు అప్‌డేట్ చేస్తే చాలు, పూర్తి స్థాయి గేమ్ ల‌భిస్తుంది. అయితే ఐఓఎస్ ప్లాట్‌ఫాంపై గేమ్‌ను ఇంకా లాంచ్ చేయ‌లేదు. త్వ‌ర‌లోనే ఆ ప్లాట్‌ఫాంపై కూడా ఈ గేమ్ అందుబాటులోకి వ‌స్తుంద‌ని తెలుస్తోంది. కాగా ఇప్ప‌టికే బ్యాటిల్‌గ్రౌండ్స్ మొబైల్ ఇండియా గేమ్ బీటా వెర్ష‌న్‌లో ఉండ‌గానే 1 కోటి డౌన్‌లోడ్స్‌ను పూర్తి చేసుకోవడం విశేషం. గేమ్‌ను ప్రీ రిజిస్ట‌ర్ చేసుకున్న వారికి గేమ్ లాంచ్ అయ్యాక రివార్డుల‌ను అంద‌జేస్తామ‌ని క్రాఫ్ట‌న్ ప్ర‌క‌టించింది. చెప్పిన‌ట్లుగానే యూజర్ల‌కు రివార్డుల‌ను అందిస్తోంది. గేమ్‌ను ప్రీ రిజిస్ట‌ర్ చేసుకున్న వారు ప్ర‌స్తుతం దాన్ని గూగుల్ ప్లే స్టోర్‌లో డౌన్‌లోడ్ చేసుకుంటే గేమ్‌లో రివార్డులు ల‌భిస్తాయి.
కాగా కొత్త గేమ్‌లో పెద్దగా ఏమీ మార్చ‌లేదు. స్వ‌ల్ప మార్పులు చేశారు. అవే మ్యాప్స్, అవే వెప‌న్స్‌, గ్రాఫిక్స్‌, గేమ్ ప్లే ఉన్నాయి. కానీ భార‌తీయ చ‌ట్టాల‌కు అనుగుణంగా గేమ్‌ను రీడిజైన్ చేశారు. ఇక ప‌బ్‌జి గేమ్ ఈ విధంగా మారి మళ్లీ అధికారికంగా లాంచ్ అయ్యే స‌రికి ప‌బ్ జి ల‌వ‌ర్లు అమిత‌మైన ఆనందాన్ని వ్య‌క్తం చేస్తున్నారు. సోష‌ల్ మీడియాలో మీమ్స్ పెడుతూ త‌మ ఆనందాన్ని వ్య‌క్తం చేస్తున్నారు.
