గోషామహల్ బిజెపి ఎమ్మెల్యే రాజాసింగ్ మహమ్మద్ ప్రవక్తను కించపరిచే విధంగా వివాదాస్పద వ్యాఖ్యలు చేసిన సంగతి తెలిసిందే. రాజాసింగ్ ఓ వివాదాస్పద వీడియోని శ్రీరామ్ ఛానల్ తెలంగాణ లో అప్లోడ్ చేశారు. ఆ వీడియోలో ఓ 53 ఏళ్ల వ్యక్తి 6 ఏళ్ల బాలికను పెళ్ళాడాడని పరోక్షంగా హేళన చేసినట్లు తెలుస్తోంది. ఆ వీడియో సోమవారం వెలువడ్డాక బషీర్బాగులోని హైదరాబాద్ పోలీస్ కమిషనరేట్ కార్యాలయం ముందు నిరసన ప్రదర్శనలు చోటు చేసుకున్నాయి.
ముస్లిం నేతలు తమ మత మనోభావాలను కించపరిచే విధంగా రాజా సింగ్ వ్యాఖ్యలు చేశారని ఆరోపించారు. ఈ నేపథ్యంలో ఈరోజు ఉదయం రాజాసింగ్ ని అరెస్టు చేశారు పోలీసులు. ఈ పరిణామాలతో రాజా సింగ్ పై కేంద్రం సీరియస్ అయింది. పార్టీ విధానాలకు వ్యతిరేకంగా మాట్లాడినందుకు సస్పెండ్ చేస్తున్నట్లు ప్రకటించింది బిజెపి. పార్టీ నుంచి ఎందుకు బహిష్కరించకూడదో పది రోజుల్లో సమాధానం చెప్పాలని షోకాజ్ నోటీసులు జారీ చేసింది.
