భారత్‌తో శాంతి చర్చలు జరిపేందుకు తాము సిద్ధంగా ఉన్నామని పాకిస్థాన్ పీపుల్స్ పార్టీ చీఫ్ బిలావల్ భుట్టో ప్రకటించారు. అయితే, ఈ చర్చలకు భారత్ నిజాయితీతో, తెరిచిన హృదయంతో రావాలని ఆయన సూచించారు. “భారత్ శాంతి మార్గాన్ని ఎంచుకుంటే, పొరుగు దేశాలుగా మేం చర్చలకు సిద్ధం. కానీ వారు వాస్తవాలతో రావాలి, కల్పిత కథలతో కాదు. బిగించిన పిడికిళ్లతో కాకుండా, స్నేహపూర్వక హస్తాలతో రావాలి” అని భుట్టో వ్యాఖ్యానించారు. ఇక్కడ గమనార్హమైన విషయం ఏమిటంటే, కొద్ది రోజుల క్రితమే బిలావల్ భుట్టో సింధూ జలాల విషయంలో వివాదాస్పద వ్యాఖ్యలు చేశారు.
భారత్ నీటిని నిలిపివేస్తే, భారతీయుల రక్తం పారిస్తానంటూ ఆయన చేసిన వ్యాఖ్యలు తీవ్ర దుమారం రేపాయి. ఇప్పుడు ఆయన శాంతి చర్చలకు సిద్ధమని ప్రకటించడం ఆశ్చర్యం కలిగిస్తోంది. నిపుణుల అభిప్రాయం ప్రకారం, బిలావల్ భుట్టో తాజా వ్యాఖ్యలు పాకిస్థాన్ మారుతున్న రాజకీయ వ్యూహాన్ని సూచిస్తున్నాయి. అంతర్జాతీయంగా ఒత్తిడి పెరుగుతున్న నేపథ్యంలో, శాంతి చర్చల ప్రతిపాదన ద్వారా పాకిస్థాన్ తన చిత్తశుద్ధిని చాటుకోవడానికి ప్రయత్నిస్తుండవచ్చు. అయితే, గతంలో ఆయన చేసిన వివాదాస్పద వ్యాఖ్యల నేపథ్యంలో, భారత్ ఈ ప్రతిపాదనను ఎంతవరకు విశ్వసిస్తుందనేది వేచి చూడాలి.
