ప‌శ్చిమ బెంగాల్ కు చెందిన భార‌తీయ జ‌న‌తా పార్టీ ఎంపీ లాకెట్ ఛ‌ట‌ర్జీకి కరోనా పాజిటివ్ నిర్ధార‌ణ అయిన‌ట్లు ఆ రాష్ట్ర వైద్యాధికారులు శుక్ర‌వారం వెల్లడించారు. ఈ మేర‌కు ఎంపీ ఛటర్జీ ట్వీట్ చేశారు. త‌న‌కు కరోనా వైర‌స్ పాజిటివ్ నిర్ధార‌ణ అయింద‌ని తెలిపారు. గ‌త వారం రోజుల నుంచి త‌న‌కు స్వ‌ల్ప జ్వ‌రం ఉండ‌టంతో సెల్ఫ్ ఐసోలేష‌న్ లో ఉన్నాన‌ని వెల్లడించారు.
I have tested postive for Covid19 this morning, having mild fever and was in self-isolation for the past one week. I will keep everyone posted. All is well.
— Locket Chatterjee (@me_locket) July 3, 2020
అయితే తన ఆరోగ్య పరిస్థితి ప్రస్తుతం బాగానే ఉందని ఆమె పేర్కొన్నారు. కాగా, జూన్ 19న నిర్వ‌హించిన ఆర్మీ జ‌వాను రాజేష్ ఓరాంగ్ అంత్య‌క్రియ‌ల్లో ఎంపీ ఛటర్జీతో పాటు ఎంపీ సుమిత్రా ఖాన్ పాల్గొన్నారు. ఈ అంత్య‌క్రియ‌లకు వంద‌లాది మంది హాజరయ్యారు. అలాగే బీజేపీ మద్దతుదారులతో కలిసి జూన్ 24న రహదారి ముట్టడి కార్యక్రమానికీ లాకెట్ ఛటర్జీ హాజరయ్యారు. దీంతో ఆమెకు కరోనా పాజిటివ్‌గా తేలడంతో ఛటర్జీతో కలిసి పలు కార్యక్రమాల్లో పాల్గొన్న నేతలు, సన్నిహితుల్లో ఆందోళన వ్యక్తమవుతోంది.
