వయసు పెరిగే కొద్దీ జ్ఞాపకశక్తి తగ్గడం, విషయాలు వేగంగా అర్థం కాకపోవడం సహజం. అయితే మన మెదడు ఎప్పుడూ చురుకుగా, ఆరోగ్యంగా ఉండాలంటే రోజువారీ జీవితంలో కొన్ని చిన్న చిన్న మార్పులు చేసుకుంటే చాలు. ఎయిమ్స్లో శిక్షణ పొందిన ప్రముఖ న్యూరోసర్జన్ డాక్టర్ అరుణ్ ఎల్. నాయక్ తెలిపిన కొన్ని సులభమైన అలవాట్లు పాటిస్తే జ్ఞాపకశక్తి, ఏకాగ్రత అద్భుతంగా మెరుగవుతాయి. ఆ అలవాట్లేంటో ఇప్పుడు వివరంగా చూద్దాం..
గాఢమైన నిద్ర – మెదడుకు రీఛార్జ్: మెదడు సరిగ్గా పనిచేయడానికి సరైన నిద్ర చాలా అవసరం. మనం పడుకున్నప్పుడే మెదడు తనను తాను క్లీన్ చేసుకుని, జ్ఞాపకాలను భద్రపరుచుకుంటుంది. ఇక అందుకే రోజూ రాత్రి 7 నుంచి 8 గంటల పాటు ప్రశాంతమైన నాణ్యమైన నిద్రపోవడం చాలా ముఖ్యం.
ఉదయపు ఎండ – జీవ గడియారానికి మెరుగు: ఉదయాన్నే కనీసం 10 నిమిషాలు లేత సూర్యరశ్మిలో గడపడం వల్ల శరీరంలోని జీవ గడియారం సరిగ్గా పనిచేస్తుంది. ఇక ఇది నిద్ర నాణ్యతను పెంచడమే కాకుండా, రోజంతా మూడ్ బాగుండేలా, మెదడు చురుకుగా ఉండేలా చేస్తుంది.
శరీరానికి వ్యాయామం – మెదడుకు బలం: కాళ్ల కండరాలు బలంగా ఉంటే మెదడు ఆరోగ్యం కూడా బాగుంటుంది. ఇక రోజువారీగా స్క్వాట్స్ చేయడం, వారానికి కనీసం రెండుసార్లు వెయిట్ ట్రైనింగ్ లేదా బరువులు ఎత్తే వ్యాయామాలు చేయడం వల్ల శరీరంలో రక్తప్రసరణ పెరిగి మెదడు పనితీరు మెరుగవుతుంది.
సామాజిక సంబంధాలు – ఒంటరితనానికి చెక్: ఎప్పుడూ ఒంటరిగా ఉండకుండా కుటుంబ సభ్యులు, స్నేహితులతో సరదాగా గడపడం మెదడుకు మంచిది. ఇక రోజుకి కనీసం ఒకరితోనైనా మనస్ఫూర్తిగా మాట్లాడటం వల్ల మానసిక ప్రశాంతత లభించి మెదడు ఎప్పుడూ యాక్టివ్గా ఉంటుంది.
కొత్త విషయాలు నేర్చుకోవడం: మెదడుకు నిరంతరం పని చెప్తూ ఉండాలి. కొత్త భాష నేర్చుకోవడం, కొత్త సంగీత వాయిద్యాన్ని వాయించడం లేదా ఏదైనా కొత్త హ్యాబీని అలవర్చుకోవడం వల్ల మెదడులోని నరాలు చురుకుగా మారి ఆలోచనా శక్తి పెరుగుతుంది.
సప్లిమెంట్ల వాడకంలో జాగ్రత్త: ఒమేగా-3, బి-విటమిన్లు మెదడుకు మంచివే అయినప్పటికీ, ప్రతి ఒక్కరూ సప్లిమెంట్లు వాడాల్సిన పనిలేదు. ఇక శరీరంలో ఏవైనా పోషకాల లోపం ఉందేమో డాక్టర్ ద్వారా పరీక్షలు చేయించుకుని, వారి సలహా మేరకే వీటిని తీసుకోవాలి.
మెదడు ఆరోగ్యం అనేది మన రోజువారీ చిన్న చిన్న అలవాట్లపైనే ఆధారపడి ఉంటుంది. క్రమశిక్షణతో కూడిన నిద్ర, వ్యాయామం, సానుకూల ఆలోచనలతో మీ మెదడును ఎల్లప్పుడూ పదునుగా, ఆరోగ్యంగా ఉంచుకోండి.
గమనిక: ఈ సమాచారం కేవలం అవగాహన కోసం మాత్రమే అందించబడింది. ఆరోగ్యపరమైన సందేహాలు లేదా తీవ్రమైన జ్ఞాపకశక్తి సమస్యలు ఉంటే నిపుణులైన వైద్యులను సంప్రదించడం శ్రేయస్కరం.
