ప్రస్తుత కాలంలో ఎండ వేడిమి నుంచి తట్టుకోవడానికి ఆఫీసుల్లోనే కాకుండా ప్రతి ఇంట్లోనూ ఏసీల వాడకం విపరీతంగా పెరిగిపోయింది. అయితే చాలా మంది నిరంతరం ఏసీ గదుల్లోనే గడుపుతూ ఉంటారు. ఇలా రోజంతా ఏసీలోనే ఉండటం వల్ల ఎముకలు బలహీనపడతాయా? కీళ్ల నొప్పులు, ఆర్థరైటిస్ వచ్చే అవకాశం ఉందా? అనే అనుమానాలు ఈ మధ్య చాలామందిలో ఎక్కువయ్యాయి. ఈ విషయంలో ప్రముఖ ఆర్థోపెడిక్ నిపుణులు వెల్లడించిన కొన్ని కీలకమైన విషయాలు ఇప్పుడు తెలుసుకుందాం..
ఏసీ వల్ల ఎముకలు నేరుగా బలహీనపడతాయా?: ఎయిర్ కండిషనింగ్ (AC) మన ఎముకలను నేరుగా బలహీనపరచదని నిపుణులు స్పష్టం చేస్తున్నారు. ఎముకల బలం అనేది మనం తీసుకునే కాల్షియం, విటమిన్ డి, సమతుల్య ఆహారం మరియు వ్యాయామంపై ఆధారపడి ఉంటుంది. అయితే, ఎప్పుడూ ఏసీ గదుల్లోనే ఉంటూ అస్సలు ఎండ తగలకుండా ఉంటే మాత్రం శరీరంలో విటమిన్ డి లోపం ఏర్పడుతుంది. ఇది దీర్ఘకాలంలో ఎముకలను బలహీనపరిచి ‘ఆస్టియోపొరోసిస్’ అనే వ్యాధికి దారితీస్తుంది. అంటే ఏసీ పరోక్షంగా ఎముకలపై ప్రభావం చూపుతుందన్నమాట.
ఆర్థరైటిస్ నొప్పులు పెరుగుతాయా?: చల్లటి ఏసీ గాలి వల్ల కొత్తగా ఆర్థరైటిస్ వ్యాధి రాదు, అలాగే కీళ్లకు ఎలాంటి శాశ్వత నష్టం జరగదు. కానీ, ఇప్పటికే కీళ్ల నొప్పులు లేదా ఆస్టియో ఆర్థరైటిస్ ఉన్నవారికి మాత్రం చల్లని వాతావరణం అస్సలు పడదు. ఇక ఏసీ చల్లదనానికి వారి కీళ్లలో బిగుతు (స్టిఫ్నెస్) పెరిగి, నొప్పులు మరియు అసౌకర్యం మరింత తీవ్రమయ్యే అవకాశం ఉంది.
సూర్యరశ్మి మరియు విటమిన్ డి చాలా ముఖ్యం: ఎముకలు గట్టిగా ఉండాలంటే సూర్యరశ్మి తప్పనిసరి. అందుకోసం ప్రతిరోజూ కనీసం 10 నిమిషాలైనా ఎండలో గడపాలి. ఇక ముఖ్యంగా ఉదయం 7 గంటల నుండి 8 గంటల మధ్య వచ్చే సూర్యరశ్మి వల్ల శరీరానికి అవసరమైన విటమిన్ డి పుష్కలంగా లభిస్తుంది. ఏసీల్లో ఉండేవారు ఈ విషయాన్ని అస్సలు మర్చిపోకూడదు.
ఎముకల బలానికి ఎలాంటి ఆహారం తీసుకోవాలి?: ఏసీ వల్ల కలిగే పరోక్ష నష్టాల నుంచి ఎముకలను కాపాడుకోవడానికి కాల్షియం, విటమిన్ డి సమృద్ధిగా ఉండే ఆహారం తీసుకోవాలి. ఇక ఇందుకోసం మీ రోజువారీ డైట్లో పాలు తాగడం, జున్ను, పెరుగు మరియు పనీర్ వంటి పాల ఉత్పత్తులను చేర్చుకోవడం ఎంతో మంచిది.
ఇక ఏసీ మనకు సౌకర్యాన్ని ఇచ్చినప్పటికీ, నిరంతరం అందులోనే గడపడం వల్ల శరీరానికి ప్రకృతి సిద్ధంగా అందాల్సిన ఎండ దూరం అవుతుంది. కాబట్టి, ఏసీని పరిమితంగా వాడుకుంటూ, రోజూ కాసేపు ఎండలో గడపడం మరియు మంచి పౌష్టికాహారం తీసుకోవడం ద్వారా మన ఎముకల ఆరోగ్యాన్ని సురక్షితంగా ఉంచుకోవచ్చు.
గమనిక: పైన ఇచ్చిన సమాచారం కేవలం మీ అవగాహన కోసం మాత్రమే అందించబడింది. మీకు ఇప్పటికే తీవ్రమైన ఎముకల బలహీనత లేదా కీళ్ల నొప్పుల సమస్యలు ఉంటే నిర్లక్ష్యం చేయకుండా వెంటనే ఒక మంచి ఆర్థోపెడిక్ డాక్టర్ను సంప్రదించి తగిన సలహా, చికిత్స తీసుకోవడం మంచిది.
