ఏపీలోని పల్నాడు జిల్లా పిడుగురాళ్లలో ఘోర రోడ్డు ప్రమాదం చోటుచేసుకుంది. శుక్రవారం తెల్లవారు జామున 4 గంటల టైంలో పిడుగురాళ్ల ఓవర్ బ్రిడ్జి మీద గుర్తు తెలియని వాహనం ఢీకొట్టినట్లు సమాచారం. ఈ ఘటనలో మల్లాల వీరాంజనేయులు (35) s/o శ్రీనివాసులు అక్కడికక్కడే మరణించాడు. మృతుడు తన అత్తగారిళ్లు అయిన పిడుగురాళ్ళ‌కు వచ్చి నేడు ఉదయం 3.30 సమయంలో తన స్వగ్రామం నరసరావుపేటకి వెళ్తుండగా ఈ ప్రమాదం జరిగింది.
ప్రమాదం జరిగిన సమయంలో బ్రిడ్జి పై నుంచి బైక్‌తో సహా వీరాంజనేయులు కిందపడి మృతి చెందినట్లు పోలీసులు వెల్లడించారు. గుర్తు తెలియని వాహనం ఢీకొనడం వలన అతను బ్రిడ్జిపై నుంచి బైక్ సహా కింద పడిపోయాడా? లేక నిద్రమత్తులో అలా జరిగిందా? అనే విషయంపై పోలీసులు ఆరా తీస్తున్నారు. మృతదేహాన్ని పోస్టుమార్టం నిమిత్తం గురజాల ఆస్పత్రికి తరలించారు. ఈ మేరకు కేసు నమోదు చేసి దర్యాప్తు చేస్తున్నట్లు పిడుగురాళ్ల ఎస్సై మోహన్ తెలిపారు.
