దిశ హత్యాచార కేసు నిందితుల్లో ఒకడైన చెన్నకేశవులు భార్య మైనర్ అని తాజా విచారణలో తేలింది. నారాయణపేట జిల్లా బాలల సంరక్షణ విభాగం అధికారులు నిన్న నిందితుడి గ్రామంలో జరిపిన ప్రాథమిక విచారణలో ఈ విషయం వెల్లడైంది. అయితే ఆమె వయసు 13సంవత్సరాల ఆరు నెలలుగా గుర్తించారు. ఆమె పుట్టింది 15-06-2006గా ఉంది. ఆమె ప్రస్తుతం 6 నెలల గర్భవతి కూడా. దీంతో చెన్నకేశవులు తల్లిదండ్రులతో అధికారులు మాట్లాడారు. బాలికకు 18 ఏళ్లు వచ్చే వరకు బాలల సదనంలో రక్షణ కల్పిస్తామని అధకారులు దృష్టికి తీసుకెళ్లారు. అందుకు వారు నిరాకరించారు.
13 ఏళ్ల‌కే.. ఆరు నెలల గర్భవతి:
తల్లిదండ్రులు లేకపోవడంతో చిన్నప్పటి నుంచి బాబాయి, నాయనమ్మ వద్ద ఆమె ఉండేది. చెన్నకేశవుల‌ను ప్రేమ వివాహం చేసుకున్న తరువాత అత్తగారింటికి వచ్చింది. అయితే ఆ బాలికకు మరో చెల్లెలు, తమ్ముడు ఉన్నారు. ప్రస్తుతం వాళ్లిద్దరు తమ బాబాయి ఇంట్లో ఉంటున్నారు. వారినైనా సంరక్షణ కేంద్రానికి పంపిస్తారా అని అధికారులు అడిగారు. బాలిక చెల్లెలు తమ వద్దే ఉంటుందని, తమ్ముడిని సంరక్షణ కేంద్రానికి పంపిస్తానని వారి బాబాయి తెలిపారు.
