వర్షాకాలం వాతావరణాన్ని చల్లబరిచినా.. బ్యాక్టీరియా, ఫంగస్ వంటి సూక్ష్మజీవులు పెరగడానికి కూడా కారణమవుతుంది. అందుకే ఈ సీజన్లో ఆహార పరిశుభ్రతపై ప్రత్యేక శ్రద్ధ పెట్టాలని నిపుణులు చెబుతుంటారు. ప్రముఖ న్యూట్రిషనిస్ట్ కిరణ్ కుక్రేజా తన ‘నట్టీ ఓవర్ న్యూట్రిషన్’ ఇన్స్టాగ్రామ్ పేజీలో వర్షాకాలంలో ఇన్ఫెక్షన్ల భయం లేకుండా ఉండటానికి ఎలాంటి కూరగాయలకు దూరంగా ఉండాలో, వేటిని తినాలో వివరించారు. ఆ విశేషాలు ఇప్పుడు చూద్దాం.
ఆకుకూరలతో ఇన్ఫెక్షన్ల భయం: వర్షాకాలంలో పాలకూర వంటి ఆకుకూరలకు కాస్త దూరంగా ఉండటమే మంచిది. వీటిలో విటమిన్లు, ఖనిజాలు పుష్కలంగా ఉన్నప్పటికీ, తడి వాతావరణం వల్ల వీటిపై బ్యాక్టీరియా, ఇతర కాలుష్య కారకాలు ఎక్కువగా చేరే అవకాశం ఉంది. ఆకుకూరలను ఎంత బాగా కడిగినా కొన్ని రకాల సూక్ష్మజీవులు అలాగే ఉండిపోయే ప్రమాదం ఉంది, దీనివల్ల కడుపు ఇన్ఫెక్షన్లు, ఫుడ్ పాయిజనింగ్ కావచ్చు.
క్యాబేజీ, క్యాలీఫ్లవర్తో జాగ్రత్త: క్యాబేజీ, క్యాలీఫ్లవర్ వంటి కూరగాయల విషయంలో ఈ సీజన్లో చాలా జాగ్రత్తగా ఉండాలి. వీటి పొరలు, పువ్వుల నిర్మాణం మధ్యలో తేమ, మురికి మరియు బ్యాక్టీరియా సులభంగా చేరిపోతాయి. వర్షాకాలంలో ఉండే అధిక తేమ వల్ల ఇవి త్వరగా పాడవుతాయి మరియు వీటిని పూర్తిగా శుభ్రం చేయడం కూడా కష్టమవుతుంది. సరిగ్గా వండకపోతే జీర్ణ సమస్యలు తప్పవు.
మష్రూమ్స్ (పుట్టగొడుగులు) రిస్క్ కావచ్చు: మష్రూమ్స్ సహజంగానే తేమ ఎక్కువగా ఉండే ప్రదేశాలలో పెరుగుతాయి కాబట్టి, వర్షాకాలంలో వీటిలో కాలుష్యం లేదా ఫంగస్ చేరే ఛాన్స్ చాలా ఎక్కువ. వీటిని సరిగ్గా నిల్వ చేయకపోయినా లేదా పూర్తిగా ఉడికించకపోయినా ఫుడ్ పాయిజనింగ్ అయ్యే ముప్పు పెరుగుతుంది. నమ్మకమైన చోట మాత్రమే తాజా మష్రూమ్స్ కొని, బాగా క్లీన్ చేశాకే వండుకోవాలి.
మొలకలు వచ్చిన బంగాళాదుంపలు వద్దు: బంగాళాదుంపలపై మొలకలు రావడం ప్రారంభిస్తే, వాటిలో ‘సోలనిన్’ అనే సహజ సిద్ధమైన టాక్సిన్ (విషపూరిత సమ్మేళనం) స్థాయిలు పెరుగుతాయి. ఇలాంటి మొలకలు వచ్చిన బంగాళాదుంపలను తింటే వికారం, తలనొప్పి, కడుపు నొప్పి వంటి సమస్యలు వస్తాయి. కాబట్టి వర్షాకాలంలో వీటిని పారేసి, మంచి తాజా దుంపలను ఎంచుకోవడం ఉత్తమం.
వీటికి బదులు ఏవి తినాలి?: వర్షాకాలంలో సురక్షితంగా ఉండటానికి తక్కువ తేమ శాతం ఉండే కూరగాయలను డైట్లో చేర్చుకోవాలి. ఆనపకాయ (సొరకాయ), బీరకాయ, పొట్లకాయ, మొక్కజొన్న, మరియు గోరుచిక్కుడు వంటి కూరగాయలు వర్షాకాలానికి చాలా మంచివి. ఇవి ఇన్ఫెక్షన్ల రిస్క్ను తగ్గించి, శరీరానికి అవసరమైన పోషకాలను అందిస్తాయి.
వర్షాకాలంలో రుచికరమైన ఆహారం కంటే ఆరోగ్యకరమైన, సురక్షితమైన ఆహారానికే ప్రాధాన్యత ఇవ్వాలి. హాని కలిగించే కూరగాయలను పక్కన పెట్టి, తాజా మరియు తేలికగా అరిగే ప్రత్యామ్నాయాలను ఎంచుకోవడం ద్వారా వర్షాల సీజన్ను హ్యాపీగా, హెల్తీగా ఎంజాయ్ చేయవచ్చు.
గమనిక: ఈ సమాచారం నిపుణుల సలహాలు మరియు సాధారణ అవగాహన కోసం మాత్రమే ఇవ్వబడింది. వర్షాకాలంలో తీవ్రమైన కడుపునొప్పి, వాంతులు లేదా అలర్జీ వంటి సమస్యలు తలెత్తితే వెంటనే డాక్టర్ను సంప్రదించడం మంచిది.
