ట్విటర్ పై ప్రపంచ కుబేరుడు, టెస్లా దిగ్గజం ఎలాన్ మస్క్ మరోసారి సంచలన వ్యాఖ్యలు చేశారు. పది ట్విటర్ ఖాతాల్లో ఎనిమిది నకిలీవే అన్న టాప్ మోస్ట్ సైబర్ సెక్యూరిటీ నిపుణుడు డాన్ వుడ్స్ వాదనను ఉటంకిస్తూ ఎలాన్ మస్క్ మరోసారి ట్విట్టర్పై విరుచుకుపడ్డారు. గతంలో ట్విటర్ చెప్పినట్లు నకిలీ ఖాతాల సంఖ్య 5శాతం కాదని కచ్చితంగా అంతకంటే ఎక్కువేనని ఎద్దేవా చేశారు మస్క్.
యూఎస్ ఫెడరల్ లా ఎన్‌ఫోర్స్‌మెంట్, ఇంటెలిజెన్స్ ఆర్గనైజేషన్‌లతో 20 సంవత్సరాలకు పైగా పనిచేసిన సైబర్ సెక్యూరిటీ కంపెనీ ఎఫ్-5 గ్లోబల్ హెడ్ ఆఫ్ ఇంటెలిజెన్స్ డాన్ వుడ్స్ 80 శాతానికి పైగా ట్విట్టర్ ఖాతాలు నకిలీవి కావచ్చని ది ఆస్ట్రేలియన్‌ పత్రికతో అన్నారు. అలాగే ట్విట్టర్ యజమాన్యం, ఎలాన్ మస్క్ ఇద్దరూ ఈ సమస్యను తక్కువ అంచనా వేసినట్లు చెప్పారు.
ట్విటర్ను 44 బిలియన్‌ డాలర్లకు (సుమారు రూ.3.50 లక్షల కోట్లు) కొనుగోలు చేసేందుకు ఆ సంస్థతో కుదుర్చుకున్న ఒప్పందాన్ని జులైలో రద్దు చేసుకున్నారు మస్క్. నకిలీ ఖాతాల సంఖ్యకు సంబంధించి తాను అడిగిన సమాచారాన్ని ఇవ్వడంలో ట్విటర్ విఫలమైనందునే ఈ నిర్ణయం తీసుకున్నట్లు పేర్కొన్నారు.
