టెస్లా అధినేత ఎలాన్ మస్క్ ట్విటర్‌ను సొంతం చేసుకున్న తర్వాత ఆ సంస్థలో మార్పులకు శ్రీకారం చుట్టారు. ఇప్పటికే బ్లూటిక్ సబ్‌స్క్రిప్షన్ విధానం ప్రవేశపెట్టిన మస్క్.. తాజాగా డిజిటల్ పేమెంట్స్‌పై ఫోకస్ చేస్తున్నారు. డిజిటల్ చెల్లింపుల కోసం ట్విటర్లో సరికొత్త ఫీచర్ను అందుబాటులోకి తెస్తున్నట్లు ఎలాన్ మస్క్ స్వయంగా వెల్లడించారు. అడ్వర్టైజర్లతో జరిగిన సమావేశంలో ఈ విషయం చెప్పారు మస్క్.
ట్విటర్ డిజిటల్ చెల్లింపులకు బాటలు వేస్తుందని అడ్వర్టైజర్లకు వివరించారు మస్క్. బ్లూటిక్ సబ్స్క్రైబర్లు క్రిడెట్ కార్డ్ లేదా డెబిట్ కార్డ్తోనే సైన్అప్ చేయాల్సి ఉంటుందని గుర్తు చేశారు. దానినే ఇతరులకు నగదు పంపేందుకూ విస్తరించనున్నట్లు తెలిపారు. ఇప్పటికే ఉన్న బ్యాంకు ఖాతా నుంచి ట్విటర్ ద్వారా యూజర్లు ఇతరులకు డిజిటల్ పేమెంట్స్ చేయొచ్చని వివరించారు.
బ్యాంకు ఖాతాకు బదులు ట్విటర్ అకౌంట్లోనూ నగదు డిపాజిట్ చేసుకునే వెసులుబాటు కల్పిస్తామని, అలా జమ చేసే యూజర్లకు అధిక వడ్డీ కూడా చెల్లిస్తామని తెలిపారు. అలా క్రమంగా డెబిట్ కార్డ్లు, చెక్లు జారీ చేసి.. ఈ వ్యవస్థను సాధ్యమైనంతగా విస్తరిస్తామని వివరించారు ఎలాన్ మస్క్. ట్విటర్ ద్వారా డిజిటల్ చెల్లింపులకు వీలు కల్పించేలా అనుమతులు ఇవ్వాలని అమెరికాలోని సంబంధిత ప్రభుత్వ సంస్థలకు ఆ కంపెనీ గత వారమే దరఖాస్తు చేసినట్లు తెలిసింది.
