ఈ రోజుల్లో ఫోన్ తీసి అలా ట్యాప్ చేస్తే చాలు, పది నిమిషాల్లో మన ఇంటి ముందు సరుకులు ఉంటున్నాయి. బ్లింకిట్, ఇన్స్టామార్ట్ వంటి యాప్స్ మన జీవితాన్ని ఎంత సులభం చేశాయో, అంతే సైలెంట్గా మన జేబుకు చిల్లు పెడుతున్నాయి. సౌకర్యం పేరుతో మనం ఎంత వృధా చేస్తున్నామో తెలుసుకోవడానికి ఒక వ్యక్తి ఈ యాప్స్కు 30 రోజులు బ్రేక్ ఇచ్చారు. ఆ తర్వాత జరిగిన ఆసక్తికర మార్పులు మీకోసం.
మినిమమ్ ఆర్డర్ మాయాజాలం: మనకు కావాల్సింది కేవలం 50 రూపాయల పాల ప్యాకెట్ లేదా రెండు పచ్చిమిర్చి కావచ్చు. కానీ డెలివరీ ఛార్జీలు పడకూడదని, ఆ కారును 200 రూపాయల వరకు నింపుతాము. వద్దు అనుకున్నా ఒక చాక్లెట్, అవసరం లేని స్నాక్స్ యాడ్ చేస్తాం. ఈ ‘ఫ్రిక్షన్ లెస్ స్పెండింగ్’ వల్ల తెలియకుండానే రోజుకు వందల రూపాయలు అదనంగా ఖర్చవుతున్నాయి.
చిన్న ఖర్చులే కొండంత: కేవలం 30 రోజులు ఈ యాప్స్ వాడటం మానేస్తే తెలిసిన విషయం ఏంటంటే.. అవసరమైనవే కొన్నప్పుడు డబ్బు చాలా ఆదా అవుతోంది. కిరాణా షాపుకు వెళ్తే కేవలం కావాల్సిన 100 రూపాయల వస్తువులే కొంటాం. ‘ఇది కూడా ఉంటే బాగుంటుంది’ అనే అనవసరపు ఆలోచన అక్కడ రాదు. నెలాఖరుకు లెక్క చూసుకుంటే ఈ చిన్న మొత్తాలే వేలల్లో మిగులుతున్నాయి.
నడక అలవాటైంది: యాప్స్ వల్ల మనం సోఫాలో నుంచి లేవాల్సిన అవసరం లేకుండా పోయింది. అదే బయటకు వెళ్లి కూరగాయలు తెచ్చుకోవడం వల్ల రోజూ కొంచెం నడక తోడవుతుంది. జిమ్కు వెళ్లాల్సిన పని లేకుండానే శరీరం యాక్టివ్గా మారుతుంది. బయట ప్రపంచాన్ని చూడటం, నలుగురితో మాట్లాడటం వల్ల మానసిక ప్రశాంతత కూడా దక్కుతుంది.
మనసుకి నచ్చిన ఎంపిక: ఫోన్ స్క్రీన్ మీద చూడటం కంటే, మనమే స్వయంగా కూరగాయలను పట్టుకుని చూసి ఏరుకోవడం ఒక మంచి అనుభవం. ఫ్రెష్గా ఉన్నాయో లేదో మన కళ్లతో చూసి కొన్నప్పుడు కలిగే తృప్తి వేరు. ఇక సంచులను మోస్తూ ఇంటికి రావడం మనల్ని మనం గ్రౌండెడ్గా ఉంచుకోవడానికి సహాయపడుతుంది.
నియంత్రణ మన చేతుల్లోనే: టెక్నాలజీని వాడటం తప్పు కాదు, కానీ అది మనల్ని వాడుకోకూడదు. ఈ 30 రోజుల ప్రయోగం వల్ల అర్థమైంది ఏంటంటే.. సౌకర్యం కంటే పొదుపు, ఆరోగ్యం ముఖ్యం. ఎప్పుడైనా అత్యవసరమైతే తప్ప, సాధారణ రోజుల్లో బయటకు వెళ్లి షాపింగ్ చేయడం వల్ల జేబుకు, ఆరోగ్యానికి రెండింటికీ మేలే.
యాప్స్కు బానిస అవ్వకుండా, మన అవసరాలను మనం గుర్తిస్తే డబ్బుతో పాటు ఆరోగ్యాన్ని కూడా కాపాడుకోవచ్చు. ఒక్కసారి మీరు కూడా ఇలాంటి ‘నో యాప్ చాలెంజ్’ ప్రయత్నించి చూడండి, ఆ తేడా మీకే తెలుస్తుంది.
గమనిక: ఇది ఆన్లైన్ షాపింగ్ను పూర్తిగా మానేయమని చెప్పడం లేదు. అనవసరపు ఖర్చులను తగ్గించుకుని, శారీరక శ్రమను పెంచుకోవడానికి ఒక చిన్న ప్రయత్నం మాత్రమే.
