గాంధీ ఆసుపత్రి అత్యాచార ఘటనలో ఇంకా మిస్టరీ వీడలేదు. గతంలో ఇద్దరు బాధితులు ఉండగా వారిలో ఓ బాధితురాలు ఆచూకీ ఇంకా లభ్యం అవ్వలేదు. కాగా సీసీ కెమెరాల దృశ్యాలు పరిశీలించిన పోలీసులు గాంధీ నుండి ఈ నెల 11న మధ్యాహ్నం బాధితురాలు బయటికి వెళ్ళినట్టు గుర్తించారు. బాధితురాలు తిరుపతమ్మ గాంధీ నుండి ముషీరాబాద్ వైపు కాలినడకన వెళ్ళినట్టు గుర్తించారు. దాంతో ముషీరాబాద్ పరిసరాల్లో పది బృందాలుగా ఏర్పడి పోలీసులు ముమ్మరంగా గాలిస్తున్నారు.
తిరుపతమ్మ ఆచూకీ లభ్యం అయితేనే ఈ కేసులో అసలు నిజాలు తేలే అవకాశం ఉంది. ఇప్పటి వరకు పోలీసులు మొత్తం 60 మంది సాక్షులను విచారించారు. అంతే కాకుండా మరో సారి గాంధీ ఆస్పత్రిలో అణువణువు గాలిస్తున్నారు. మరోవైపు అన్ని పోలీస్ స్టేషన్ లకు తిరుపతమ్మ ఫోటోలను పంపించారు. ఈ కేసును నగర పోలీస్ కమిషనర్ అంజనీకుమార్ స్వయంగా పర్యవేక్షిస్తున్నారు. ప్రస్తుతం పోలీసుల అదుపులో ఉన్న గాంధీ ఉద్యోగులను మరోసారి విచారిస్తున్నారు.
