ఫిట్నెస్పై శ్రద్ధ పెట్టే ప్రతి ఒక్కరికీ డైట్లో ప్రొటీన్ ఎంత ముఖ్యమో ప్రత్యేకంగా చెప్పక్కర్లేదు. ముఖ్యంగా జిమ్కు వెళ్లేవాళ్లు ప్రొటీన్ కోసం గుడ్లు, పనీర్, సోయా చంక్స్ లాంటివి ఎక్కువగా తింటుంటారు. అయితే ‘వీటిలో దేనిలో ఎక్కువ ప్రొటీన్ ఉంటుంది? ఏది తింటే శరీరానికి మంచిది?’ అనే విషయంలో చాలామందికి పెద్ద కన్ఫ్యూజన్ ఉంటుంది. క్వాంటిటీ పరంగా చూస్తే ఒకటి, క్వాలిటీ పరంగా చూస్తే మరొకటి ముందంజలో ఉంటాయి. ఈ రెండింటి మధ్య ఉన్న అసలు తేడాలేంటో ఇప్పుడు చూద్దాం.
ప్రొటీన్ లెక్కలు ఇలా ఉన్నాయి: న్యూట్రిషనిస్టుల లెక్కల ప్రకారం.. సాధారణంగా ఒక కోడిగుడ్డు తింటే మనకు 6 గ్రాముల ప్రొటీన్ అందుతుంది. ఇక అదే 50 గ్రాముల పనీర్ తీసుకుంటే అందులో 9 నుంచి 10 గ్రాముల ప్రొటీన్ ఉంటుంది. వీటన్నిటికంటే ఎక్కువగా కేవలం 25 గ్రాముల సోయా చంక్స్లోనే ఏకంగా 13 గ్రాముల ప్రొటీన్ లభిస్తుంది. అంటే మొత్తంగా చూస్తే, బరువు పరంగా సోయాలోనే ప్రొటీన్ శాతం చాలా ఎక్కువగా ఉంటుంది.
క్వాలిటీలో గుడ్లే నంబర్ వన్: ప్రొటీన్ పరిమాణం పరంగా సోయా చంక్స్ మొదటి స్థానంలో ఉన్నప్పటికీ, నాణ్యత విషయానికి వస్తే మాత్రం గుడ్లదే పైచేయి అని నిపుణులు చెబుతున్నారు. ఇక ఎందుకంటే గుడ్డులో మన శరీరానికి, జీర్ణశక్తికి ఎంతో అవసరమైన ముఖ్యమైన అమైనో ఆమ్లాలు సమృద్ధిగా ఉంటాయి. ఇవి మనం తిన్న ప్రొటీన్ను శరీరం త్వరగా గ్రహించేలా చేస్తాయి.
పనీర్ స్థానం ఎక్కడంటే?: ఇక నాణ్యత పరంగా గుడ్ల తర్వాత స్థానంలో పనీర్ నిలుస్తుంది. పనీర్ అనేది శాకాహారులకు (వెజిటేరియన్లకు) ఒక అద్భుతమైన ప్రొటీన్ సోర్స్. ఇక ఇది కండరాల బలానికి, ఎముకల పుష్టికి ఎంతో మేలు చేస్తుంది. కాబట్టి ప్రొటీన్ కంటెంట్ ఎక్కువ కావాలనుకునే వారు సోయాను, క్వాలిటీ ప్రొటీన్ ఆశించేవారు గుడ్లను, పనీర్ను ఎంచుకోవచ్చు.
జిమ్ డైట్ విషయంలో కన్ఫ్యూజ్ అవ్వకుండా మీ శరీర అవసరాలను బట్టి వీటిని ఎంచుకోవడం మంచిది. కండరాల పుష్టి కోసం, బాడీ బిల్డింగ్ కోసం కేవలం ఒకే రకమైన ఆహారంపై ఆధారపడకుండా.. గుడ్లు, సోయా పనీర్ వంటి వాటిని మార్చి మార్చి మీ డైట్లో చేర్చుకుంటే శరీరానికి అవసరమైన అన్ని పోషకాలు అందుతాయి.
గమనిక: సోయాలో ప్రొటీన్ ఎక్కువగా ఉన్నప్పటికీ, దీనిని రోజూ పరిమితికి మించి అతిగా తీసుకోకూడదు. మీ బాడీ వెయిట్ మరియు వర్కవుట్ స్టైల్ను బట్టి మీకు ఎంత ప్రొటీన్ అవసరమో ఒకసారి సర్టిఫైడ్ డైటీషియన్ లేదా ఫిట్నెస్ ట్రైనర్ను సంప్రదించి డైట్ ప్లాన్ చేసుకోవడం ఉత్తమం.
