కార్తికేయ హీరో నిఖిల్​కు ఉత్తమ నటుడిగా ‘ఐకానిక్ గోల్డ్’ అవార్డు

కార్తికేయ 2 సినిమాతో టాలీవుడ్​తో పాటు పాన్ ఇండియా రేంజ్​లో గుర్తింపు తెచ్చుకున్నాడు యంగ్ హీరో నిఖిల్ సిద్ధార్థ. ఈ మూవీ విమర్శకుల ప్రశంసలతో పాటు కలెక్షన్లలోనూ దూసుకుపోయింది. ప్రపంచ వ్యాప్తంగా రూ.121 కోట్లకు పైగా వసూలు చేసింది. ఈ చిత్రం టీవీ ప్రీమియర్, ఓటీటీ స్ట్రీమింగ్‌లో కూడా ప్రేక్షకులను విపరీతంగా ఆకట్టుకుంది.

తాజాగా ఈ సినిమా ఓ అరుదైన అవార్డును సొంతం చేసుకుంది. కార్తికేయ చిత్రానికి గాను ఐకానిక్ గోల్డ్ అవార్డ్స్ 2023లో నిఖిల్ సిద్ధార్థ ఉత్తమ నటుడిగా ఎంపికయ్యారు. తాజాగా ఈ అవార్డును నిఖిల్​ అందుకున్నారు. అందుకు సంబంధించిన వీడియోను నిఖిల్​.. సోషల్​ మీడియాలో పంచుకున్నారు. బ్యాక్​గ్రౌండ్​లో ‘హే కేశవ.. హే మాధవ.. హే గోవిందా’ పాటను జోడించి పోస్ట్​ చేశారు. అయితే ఆ వీడియో చూసిన ఫ్యాన్స్​.. నిఖిల్​కు అభినందనులు చెబుతున్నారు.

కార్తికేయ సిరీస్‌లో మూడో భాగం ఉంటుందా? అని నిఖిల్​ను ప్రశ్నించగా, ‘కచ్చితంగా ఉంటుంది. సాహసాలను, సమస్యలను , మిస్టరీలను ఛేదించే ఉత్సాహం ఉన్న డాక్టర్‌ కార్తీక్‌ పాత్ర కొనసాగుతూనే ఉంటుంది. మన దేశ సంస్కృతిలో ఎవరికీ తెలియని ఎన్నో కథలు ఉన్నాయి. వాటిని స్ఫూర్తిగా తీసుకుని మరిన్ని భాగాలతో మీ ముందుకు వస్తాం’ అని నిఖిల్‌ చెప్పుకొచ్చారు.