మనలో చాల మందికి చిన్న విషయానికి బాగా ఏడుపు వస్తుంది కదా అప్పుడు కన్నీళ్లు ఆపుకోలేం కదూ? కానీ ఏడ్చిన తర్వాత కళ్లు ఉబ్బిపోయి, మొహం అంతా అలసటగా, వాచిపోయినట్లు కనిపిస్తుంది. ఆ సమయంలో వెంటనే బయటికి వెళ్లాలంటే లేదా ఎవరినైనా కలవాలంటే చాలా ఇబ్బందిగా ఉంటుంది. ఉబ్బిన కళ్లను వెంటనే తగ్గించుకోవడానికి హాస్పిటల్‌కో మెడికల్ షాప్‌కో పరుగెత్తాల్సిన అవసరం లేదు. మన ఇంట్లో ఉండే సహజ వస్తువులతో ఈ సమస్యకు చిటికెలో చెక్ పెట్టవచ్చు. మరి కళ్ళ ఉబ్బు తగ్గించే హోమ్ రెమెడీస్ ఏంటో చూద్దాం!
కళ్లు ఉబ్బడానికి ప్రధాన కారణం ఏడ్చినప్పుడు కళ్ల చుట్టూ ఉన్న కణజాలంలో నీరు నిలిచిపోవడం.ఈ సమస్యను త్వరగా తగ్గించుకోవడానికి మరి కొన్ని సులభమైన, ప్రభావవంతమైన హోమ్ రెమెడీస్ చూద్దాం.
చల్లని స్పూన్లు: ఇది చాలా మందికి తెలియని కానీ అద్భుతంగా పనిచేసే చిట్కా. నాలుగు స్టీల్ స్పూన్లను ఫ్రీజర్‌లో 10-15 నిమిషాలు ఉంచండి. ఆ తర్వాత వాటిని తీసి, గుండ్రని భాగం కళ్లపై ఉంచండి. స్పూన్లు వెచ్చబడిన తర్వాత, మిగిలిన రెండు చల్లని స్పూన్లను మార్చండి. ఈ చల్లదనం కళ్ల చుట్టూ ఉన్న రక్తనాళాలను సంకోచింపజేసి వాపును త్వరగా తగ్గిస్తుంది.
దోసకాయ ముక్కలు: దోసకాయల్లో యాంటీఆక్సిడెంట్లు మరియు శీతలీకరణ గుణాలు పుష్కలంగా ఉంటాయి. దోసకాయ ముక్కలను ఫ్రిజ్‌లో చల్లబరిచి, కళ్లపై 10 నిమిషాల పాటు ఉంచండి. దోసకాయ సహజమైన మాయిశ్చరైజర్‌గా పనిచేసి ఉబ్బరాన్ని తగ్గించడంతో పాటు కళ్ల కింద చర్మాన్ని తాజాగా మారుస్తుంది.
టీ బ్యాగ్‌లు: ఉపయోగించిన రెండు గ్రీన్ టీ లేదా బ్లాక్ టీ బ్యాగ్‌లను తీసి, వాటిని కొద్దిగా తడిపి ఫ్రిజ్‌లో 15 నిమిషాలు ఉంచండి. ఈ చల్లని టీ బ్యాగ్‌లను కళ్లపై 5-10 నిమిషాలు ఉంచడం వల్ల, టీలో ఉండే కెఫీన్ మరియు యాంటీఆక్సిడెంట్లు వాపును తగ్గిస్తాయి రక్త ప్రసరణను మెరుగుపరుస్తాయి.
చల్లని నీరు మరియు మసాజ్:ఏడ్చిన వెంటనే చల్లని నీటిని ముఖంపై ముఖ్యంగా కళ్ల చుట్టూ చిలకరించండి. ఆ తర్వాత మీ వేళ్లతో కళ్ల కింద ప్రాంతంలో, లోపలి మూలల నుండి బయటి వైపుకు సున్నితంగా మసాజ్ చేయండి. ఇది నిలిచిపోయిన నీటిని తొలగించడానికి సహాయపడుతుంది.
కన్నీళ్లు అనేది సహజమైన మానవ స్పందన. దాని వల్ల కళ్లు వాచినా ఆందోళన చెందాల్సిన అవసరం లేదు. ఈ సాధారణ హోమ్ రెమెడీస్‌తో మీరు అతి తక్కువ సమయంలోనే తిరిగి సాధారణ స్థితికి వచ్చి మీ రోజువారీ పనులను కొనసాగించవచ్చు. ఈ చిట్కాలను ప్రయత్నించి, ఆ తేడాను మీరే గమనించండి!
గమనిక: ఏడ్చిన తర్వాత కళ్లు ఉబ్బడం అనేది చాలా సాధారణం. ఈ హోమ్ రెమెడీస్ తక్షణ ఉపశమనం కోసం మాత్రమే.
