వీకెండ్ వచ్చేసిందని ఆ ఇంట్లో వాళ్లంతా ఒకచోటకు చేరుకున్నారు. సండే రోజు ఫ్యామిలీ అంతా కలిసి హాయిగా.. జాలీగా గడపాలనుకున్నారు. అనుకున్నట్టుగానే సండే హాలిడే ప్లానింగ్ చేసుకున్నారు. ఈ ఎండలో బయటకు వెళ్లడం కంటే.. ఇంట్లోనే జాలీగా గడపడం బెటర్ అని ఇంటికే పరిమితమయ్యారు. కానీ ఓ ప్రమాదం ఆ ఇంటి వాళ్లనందరిని ఒకేసారి అనంత లోకాలకు తీసుకెళ్లిపోతుందని ఎవరూ ఊహించలేదు. అకస్మాత్తుగా ఇంట్లో చెలరేగిన మంటల్లో ఐదుగురు సజీవ దహనమయ్యారు. ఈ ఘటన అమెరికా నార్త్ కరోలినాలో ఓ ఇంట్లో చోటుచేసుకుంది.
సమాచారం అందుకున్న పోలీసులు, అగ్నిమాపక దళాలు ఘటనాస్థలికి చేరుకుని మంటలను అదుపులోకి తెచ్చాయి. మృతుల్లో ముగ్గురు పెద్దలు, ఇద్దరు యువకులు ఉన్నట్లు పోలీసులు తెలిపారు. ఆదివారం ఈ దుర్ఘటన జరిగినట్లు పేర్కొన్నారు. ఈ ప్రమాదంపై దర్యాప్తు చేపడుతున్నట్లు వెల్లడించారు. ‘నార్త్ కరోలినాలోని ఓ గ్రామీణ ప్రాంతంలోని ఓ ఇంట్లో ఒక్కసారిగా మంటలు చెలరేగాయి. మాకు సమాచారం అందగానే ఘటనాస్థలికి చేరుకుని సహాయక చర్యలు చేపట్టాం. మృతులందరూ ఒకే కుటుంబానికి చెందినవారా? కాదా? అనేది ఇంకా తెలియలేదు.’ అని స్థానిక పోలీసులు తెలిపారు.
