ఆన్లైన్ క్లాసులకు హాజరయ్యేందుకు తండ్రి ఫోన్ కొనివ్వలేదని ఆత్మహత్య చేసుకున్నాడు ఓ పదో తరగతి విద్యార్థి. ఆర్థిక పరిస్థితి కుదుటపడ్డాక తప్పకుండా కొనిస్తానని చెప్పిన నాన్నకు తీరని శోకం మిగిల్చి తిరిగిరాని లోకాలు వెళ్లిపోయాడు తమిళనాడుకు చెందిన బాలుడు. తమిళనాడు కడలూరు జిల్లాకు చెందిన పదో తరగతి విద్యార్థి ఆన్లైన్ క్లాసులు వినలేకపోతున్నాననే బాధతో ఆత్మహత్య చేసుకున్నాడు.
కరోనా కాలంలో విద్యార్థుల ఆరోగ్యం దృష్ట్యా పాఠశాలలు తెరవకుండా.. గురువారం నుంచి రాష్ట్రవ్యాప్తంగా ఆన్లైన్ తరగతులు ప్రారంభించాలని ఆదేశించింది తమిళనాడు విద్యాశాఖ. ఈ నేపథ్యంలో కడలూరు, పన్రూటి గ్రామానికి చెందిన 14 ఏళ్ల విగ్నేష్ దగ్గర స్మార్ట్ ఫోన్, కంప్యూటర్ లేదు. జీడిపప్పుల వ్యాపారం చేసే తండ్రి వినయ్ కుమార్ను ఫోన్ కొనివ్వాల్సిందిగా కోరాడు. కానీ, లాక్డౌన్ కారణంగా వ్యాపారం పడిపోయిందని కాస్త డబ్బు రాగానే కొనిస్తాన్నాడు వినయ్.స్నేహితులంతా ఆన్లైన్ తరగతులకు హాజరవుతున్నారని, తాను మాత్రమే పాఠాలు వినట్లేదని మొండికేశాడు విగ్నేష్. ఆపై తీవ్ర మనస్థాపానికి గురై అమ్మ చీరతో ఉరేసుకుని ప్రాణాలు విడిచాడు.
