ఆర్బీఐ రూ. 2 వేల నోట్లను చలామణి నుంచి తొలగించింది. ఇప్పటికే ప్రజల దగ్గర ఉన్న నోట్లను మార్చుకోవడానికి సెప్టెంబర్ 30 వరకూ గడువు ఇచ్చింది. ఆ గడువుకు ఇంకా కొన్ని రోజులే ఉంది. ఈ క్రమంలోనే.. అమెజాన్‌ కీలక నిర్ణయం తీసుకుంది. క్యాష్ ఆన్ డెలివరీ పేమెంట్‌లో కష్టమర్లు ఇచ్చే 2000 నోట్లను సెప్టెంబర్ 19 నుంచి తీసుకోమని తెలిపింది.
ఇప్పటివరకు రూ. 2 వేల నోట్లను క్యాష్ ఆన్ డెలివరీ సమయంలో కస్టమర్ల నుంచి తీసుకుంటున్నామని.. వాటిని బ్యాంకుల్లో మార్చుకునే గడువు సెప్టెంబర్ 30తో ముగుస్తున్నందున వాటిని కస్టమర్ల నుంచి తీసుకోకూడదని నిర్ణయించినట్లు ఆమెజాన్ ప్రకటించింది. అయితే ఒకవేళ తాము ఆ ప్రొడక్ట్స్‌ను వేరే థర్డ్ పార్టీ కొరియర్ పార్ట్ నర్ ద్వారా డెలివరీ చేస్తే, ఆ థర్డ్ పార్టీ కొరియర్ పార్ట్ నర్ నిబంధనలు వర్తిస్తాయని, వారి నిబంధనల్లో రూ. 2 వేల నోట్లను తీసుకునే వెసులుబాటు ఉంటే తమకు అభ్యంతరం లేదని వివరించింది. ఆమెజాన్‌లో కొనుగోలు చేసిన ప్రొడక్ట్స్‌కు ఆన్ లైన్‌లో చెల్లింపులు జరపవవచ్చు. లేదా ఆ ప్రొడక్ట్‌ను డెలివరీ చేసిన సమయంలో డెలివరీ ఏజెంట్‌కు క్యాష్ రూపంలో కూడా ఇవ్వవచ్చు.
సమయం లేదు త్వరపడండి..
మీ వద్ద ఉన్న రూ. 2 వేల నోట్లను మీ ఖాతా ఉన్న బ్యాంక్‌లో జమ చేసుకోవచ్చు. లేదా రోజుకు రూ. 40 వేల పరిమితితో ఏదైనా బ్యాంక్ శాఖలో వేరే కరెన్సీతో మార్పిడి చేసుకోవచ్చు. అయితే, ఈ వెసులుబాటు సెప్టెంబర్ 30 వరకు మాత్రమే ఉంటుంది. రూ. 2 వేల నోట్లను చెలామణి నుంచి తొలగిస్తున్నట్లు మే 19న ఆర్బీఐ (RBI) ప్రకటన చేసింది. ఆ తరువాత 20 రోజుల్లోనే 50% నోట్లు బ్యాంకులకు తిరిగివచ్చాయి.
ఏది ఏమైనా… అప్పటి వరకూ వాల్యూ ఉన్న కరెన్సీ నోటు.. ఒక గడువు తరువాత చిత్తుకాగితంలా మారిపోవడం మనమే చూస్తున్నాం కదా..! విలువ లేకపోతే ఏదైనా అంతే.. మనిషినా, మనీ అియినా.. వాటికి వాల్యూ ఉన్నంత కాలమే.
