పేదవారికి కూడా ఇంటర్నెట్ సేవలు అందుబాటులో ఉండాలనే ఉద్దేశంతో ఓ వినూత్న కార్యక్రమానికి నాంది పలికింది కేరళ సర్కార్. ఏకంగా 20 లక్షల కుటుంబాలకు ఉచిత ఇంటర్నెట్ అందించేందుకు ముందుకొచ్చింది. అందులో భాగంగా చేపట్టిన కే-ఫోన్ (కేరళ ఫైబర్ ఆప్టిక్ నెట్వర్క్) ప్రాజెక్టును సోమవారం కేరళ ముఖ్యమంత్రి పినరయి విజయన్ ప్రారంభించారు. ఈ ప్రాజెక్టులో భాగంగా చౌక ధరలకు ఇంటర్నెట్ను అందించనున్నారు.
ప్రస్తుతం మార్కెట్లో ఉన్న ధరలకన్నా.. తక్కువ ధరలకే ఇంటర్నెట్ను అదిస్తామని కేరళ ప్రభుత్వం చెబుతోంది. కే-ఫోన్లో పాజెక్టు మొదటి దశలో భాగంగా 14 వేల ఇళ్లకు ఇంటర్నెట్ కనెక్షన్ ఇవ్వనున్నారు. అందులో తొలుత ప్రతి నియోజకవర్గంలో 100 కుటుంబాలకు ఇంటర్నెట్ సేవలు అందిస్తామని ప్రభుత్వం ప్రకటించింది. ఆర్థికంగా వెనుకబడిన 20 లక్షల కుటుంబాలకు ఉచిత ఇంటర్నెట్ సేవలను అందిస్తామని కేరళ ప్రభుత్వం గతంలో హామీ ఇచ్చింది. అందులో భాగంగానే కే-ఫోన్ ప్రాజెక్టుకు రూపకల్పన చేసింది. ఈ ప్రాజెక్టు పూర్తి స్థాయిలో అమలైతే ఎక్కడైనా హై స్పీడ్ ఇంటర్నెట్ను వినియోగించుకోవచ్చు.
