దేశవ్యాప్తంగా దీపావళి సంబురాలు షురూ అయ్యాయి. ప్రజలంతా తమ కుటుంబ సభ్యులతో కలిసి వేడుకలు జరుపుకుంటున్నారు. ప్రముఖులు కూడా తమ కుటుంబంతో కలిసి దీపావళి పండుగ వేడుకల్లో పాల్గొంటున్నారు. మరోవైపు ప్రధాన మంత్రి నరేంద్ర మోదీ ప్రతి ఏడాదిలాగే ఈసారి కూడా సైనికులతో దీపావళి వేడుకలు చేసుకుంటున్నారు. ఇందుకోసం ప్రధాని సోమవారం కార్గిల్ చేరుకున్నారు. కార్గిల్ సైనికులతో కలిసి మోదీ పండగ సంబరాల్లో పాల్గొంటారని ప్రధానమంత్రి కార్యాలయం వెల్లడించింది. కార్గిల్ చేరుకున్న ప్రధాని ఫొటోలను షేర్‌ చేసింది.
2014లో మోదీ ప్రధానిగా బాధ్యతలు చేపట్టిన తర్వాత తొలిసారి దీపావళి వేడుకలను సైనికులతో కలిసి చేసుకున్నారు. అప్పటి నుంచి ఏటా అదే సంప్రదాయాన్ని కొనసాగిస్తూ దేశ సరిహద్దుల్లో విధులు నిర్వహిస్తున్న జవాన్లతో కలిసి పండుగ సంబురాల్లో పాల్గొంటున్నారు. గతేడాది జమ్మూకశ్మీర్‌లోని రాజౌరీ జిల్లా నౌషేరా సెక్టార్‌లో సైనికులతో కలిసి మోదీ దీపావళి వేడుకల్లో పాల్గొన్నారు. ఈసారి కార్గిల్‌లో జవాన్లతో కలిసి ఈ వేడుకలను జరుపుకుంటున్నారు.
