సార్వత్రిక ఎన్నికల తొలిదశ పోలింగ్‌ ప్రశాంతంగా కొనసాగుతోంది. సామాన్యులతో పాటు ప్రముఖులు కూడా ఓటు హక్కు వినియోగించుకుంటున్నారు. ఇవాళ ఉదయం 7 గంటల నుంచి 21 రాష్ట్రాల్లో 102 స్థానాల్లో మొదలైన ఓటింగ్ సాయంత్రం 6 గంటలకు పూర్తి కానుంది. ఎండలు ముదిరిన నేపథ్యంలో చాలా మంది ఉదయాన్నే ఓటు వేస్తున్నారు.
తమిళనాడులో సాధారణ ప్రజలతోపాటు సినీ, రాజకీయ ప్రముఖులు పెద్ద సంఖ్యలో తరలివచ్చి ఓటు వేస్తున్నారు. కోలీవుడ్ స్టార్ హీరో అజిత్ కుమార్, సూపర్ స్టార్ రజినీ కాంత్, మరో యాక్టర్‌ శివకార్తికేయన్ తన సతీమణితో కలిసి అందరితోపాటు క్యూలైన్‌లో నిలబడి ఓటు హక్కు వినియోగించుకున్నారు. ఓటు వేసిన అనంతరం శివకార్తికేయన్ మాట్లాడుతూ.. ‘ఓటు మనందరి హక్కు. మన విధి..తొలిసారి ఓటు వేస్తున్న వారి నా అభినందనలు. మీ అభిమాన వ్యక్తికి ఓటేయండి’ అని అన్నారు. మరోవైపు చెన్నైలోని సాలిగ్రామంలో సూపర్ స్టార్ రజనీకాంత్‌, తిరువన్మియూర్‌లో ప్రముఖ నటుడు అజిత్ కుమార్ ఓటు వేశారు. అందరూ తప్పకుండా తమ ఓటు హక్కు వినియోగించుకోవాలని పిలుపునిచ్చారు.
