మనలో చాలా మందికి అప్పుడప్పుడు తలనొప్పి రావడం సహజం. కానీ, ఆ నొప్పి కేవలం తలలో ఒక పక్కన మాత్రమే వస్తూ, ప్రాణం పోయేంత పని అవుతుంటే మాత్రం అది సాధారణ తలనొప్పి కాదు. దీనినే మనం వాడుక భాషలో ‘పార్శ్వపు నొప్పి’ లేదా ‘మైగ్రేన్’ అని పిలుస్తుంటాం. అసలు ఈ నొప్పి ఎందుకు వస్తుంది? దీని నుండి ఉపశమనం పొందడం ఎలాగో ఇప్పుడు తెలుసుకుందాం.
తలనొప్పి రాగానే ఏదో ఒక టాబ్లెట్ వేసేసుకుని పనిలోకి వెళ్ళిపోవడం మనకు అలవాటు. అయితే, ఒక వైపు మాత్రమే వచ్చే నొప్పి వెనుక రకరకాల కారణాలు ఉంటాయి. ఇది కేవలం నొప్పి మాత్రమే కాదు, మన దైనందిన జీవితాన్ని అస్తవ్యస్తం చేసే ఒక హెచ్చరిక. ఈ నొప్పి ఎలా ఉంటుందంటే.. తలలో ఎవరో సుత్తితో కొడుతున్నట్టుగా లేదా నరాలు కొట్టుకుంటున్నట్టుగా అనిపిస్తుంది. ఒక వైపు తలనొప్పి రావడానికి గల కారణాలు తెలుసుకోవటం ముఖ్యం.
మానసిక ఒత్తిడి: ఆఫీసు పనులు లేదా ఇంట్లో టెన్షన్ల వల్ల మెదడులోని నరాలు ఒత్తిడికి గురవుతాయి.
నిద్రలేమి: సరైన సమయానికి నిద్రపోకపోవడం, అర్ధరాత్రి వరకు మేల్కొని ఉండటం.
ఆహారపు అలవాట్లు: సమయానికి భోజనం చేయకపోవడం లేదా అధికంగా కాఫీ, టీలు తాగడం.
పర్యావరణ మార్పులు: ఎండలో ఎక్కువగా తిరగడం, ఘాటైన వాసనలు (పర్ఫ్యూమ్స్), లేదా పెద్ద శబ్దాల వల్ల కూడా నొప్పి మొదలవ్వచ్చు.
గ్యాస్ట్రిక్ సమస్యలు: కడుపులో గ్యాస్ పేరుకుపోయినా అది తలకెెక్కి నొప్పిని కలిగిస్తుంది.
నివారణ మార్గాలు (మనం చేయగలిగేవి): ప్రశాంతమైన వాతావరణం లో ఉండటం. నొప్పి మొదలైనప్పుడు కాసేపు లైట్లు ఆర్పేసి, నిశ్శబ్దంగా ఉన్న గదిలో పడుకోండి.
నీరు తగినంత తాగండి: డీహైడ్రేషన్ వల్ల కూడా తలనొప్పి వస్తుంది. కాబట్టి రోజు మొత్తం మంచి నీరు తాగుతూ ఉండాలి.
క్రమబద్ధమైన నిద్ర: ప్రతిరోజూ కనీసం 7-8 గంటల గాఢ నిద్ర ఉండేలా చూసుకోండి.
యోగా మరియు ధ్యానం: రోజూ 15 నిమిషాల పాటు ప్రాణాయామం లేదా మెడిటేషన్ చేయడం వల్ల మెదడుకు రక్తప్రసరణ బాగా అందుతుంది.
అల్లం టీ: తలనొప్పిగా ఉన్నప్పుడు అల్లం టీ తాగడం వల్ల మంచి ఉపశమనం కలుగుతుంది. ఇది వాంతులు వచ్చే భావనను కూడా తగ్గిస్తుంది.
తలనొప్పి అనేది శరీరానికి విశ్రాంతి కావాలని ఇచ్చే ఒక సిగ్నల్. కాబట్టి దాన్ని నిర్లక్ష్యం చేయకుండా మీ జీవనశైలిలో చిన్న చిన్న మార్పులు చేసుకోండి.
గమనిక : ఈ సమాచారం కేవలం మీ అవగాహన కోసం మాత్రమే. ఒకవేళ మీకు తలనొప్పి తరచుగా వస్తున్నా, నొప్పి తీవ్రత ఎక్కువగా ఉన్నా లేదా కంటి చూపు మందగించినట్లు అనిపించినా.. వెంటనే డాక్టరును సంప్రదించి సరైన చికిత్స తీసుకోవడం ఉత్తమం.
