హిందూ సంప్రదాయంలో జరుపుకునే ప్రతి పండుగ వెనుక ఒక అద్భుతమైన ఆరోగ్య రహస్యం దాగి ఉంటుంది. ఆషాఢమాసంలో వచ్చే తొలి ఏకాదశి (జులై 25) పర్వదినాన శ్రీ మహావిష్ణువుకు పేలాల పిండిని నైవేద్యంగా సమర్పించి ప్రసాదంగా తింటారు. అసలు తొలి ఏకాదశి నాడే పేలాల పిండిని ఎందుకు ప్రసాదంగా తీసుకోవాలి? దీని వెనుక ఉన్న ఆరోగ్య ప్రయోజనాలేంటి? ఇంట్లోనే సులభంగా ఈ పిండిని ఎలా తయారు చేసుకోవాలో ఇప్పుడు వివరంగా తెలుసుకుందాం.
ఆధ్యాత్మిక ప్రాశస్త్యం.. పితృదేవతల ఆశీస్సులు: తొలి ఏకాదశి నాడు పేలాల పిండిని స్వీకరించడం వల్ల ఏడాది పొడవునా ఆరోగ్యం, శ్రేయస్సు లభిస్తాయని భక్తుల నమ్మకం. అంతేకాకుండా మనకు జన్మనిచ్చిన పితృదేవతలకు పేలాలు అంటే ఎంతో ఇష్టం. ఇక ఈ పవిత్రమైన రోజున పూర్వీకులను స్మరించుకుని పేలాల పిండిని ప్రసాదంగా నివేదించడం వల్ల వారి ఆశీస్సులు లభించి, భవిష్యత్తులో వచ్చే కష్టాలను ఎదుర్కొనే శక్తి కలుగుతుందని విశ్వసిస్తారు.
ఆరోగ్య రహస్యం.. వర్షాకాలానికి బెస్ట్: ఎండాకాలం ముగిసి వర్షాకాలం ప్రారంభమయ్యే ఈ సమయంలో వాతావరణంలో ఉష్ణోగ్రతలు ఒక్కసారిగా పడిపోతాయి. వాతావరణ మార్పుల వల్ల శరీరంలో అనేక అసమతుల్యతలు తలెత్తుతాయి. ఇక ఈ సమయంలో శరీరానికి అవసరమైన వేడిని, శక్తిని అందించడంలో పేలాల పిండి అద్భుతంగా పనిచేస్తుంది. అందుకే పూర్వీకుల నుంచి తొలి ఏకాదశి రోజున ఇళ్లలో, గుడుల్లో పేలాల పిండిని పంచే ఆనవాయితీ వస్తోంది.
ఇంట్లోనే పేలాల పిండి తయారీ విధానం: మొదట ఒక కప్పు జొన్నలను (లేదా మొక్కజొన్నలను) తీసుకుని వేడి నీళ్లలో కాసేపు ఉడికించి, ఆ తర్వాత 1-2 గంటలు ఆరబెట్టుకోవాలి. జొన్నలు ఆరిన తర్వాత బాణలిలో వేయించి పేలాలుగా మార్చుకోవాలి. ఇక ఆ పేలాలను మిక్సీలో వేసి మెత్తగా పొడి చేసుకోవాలి. ఆ తర్వాత అదే మిక్సీలో బెల్లం, ఎండు కొబ్బరి ముక్కలు, యాలకులు, కొద్దిగా పుట్నాలు వేసి మెత్తగా మిశ్రమం చేసుకోవాలి. ఇక ఈ మిశ్రమాన్ని జొన్న పేలాల పొడిలో బాగా కలిపితే ఘుమఘుమలాడే పేలాల పిండి సిద్ధమవుతుంది. (ఇప్పుడు మార్కెట్లో ఇన్స్టెంట్ పిండి పాకెట్లు కూడా దొరుకుతున్నాయి).
ఇక తొలి ఏకాదశి నాడు తీసుకునే పేలాల పిండి కేవలం సాంప్రదాయ ప్రసాదం మాత్రమే కాదు.. వర్షాకాలంలో మన ఆరోగ్యానికి రక్షణ కల్పించే అద్భుతమైన ఆహారం. ఈ ఏకాదశికి మీరు కూడా పవిత్రంగా పేలాల పిండిని తయారుచేసి స్వామివారికి నైవేద్యంగా సమర్పించి, ఆరోగ్యవంతమైన జీవితాన్ని పొందండి.
గమనిక: మధుమేహం (షుగర్) ఉన్నవారు ప్రసాదంగా తీసుకునేటప్పుడు ఇందులో బెల్లం పరిమాణం ఎక్కువగా ఉంటుంది కాబట్టి తగినంత మోతాదులోనే తీసుకోవడం మంచిది.
