కరీంనగర్ లో పట్టభద్రుల ఎమ్మెల్సీ ఎన్నికల హడావుడి మొదలైంది.. ప్రధాన పార్టీలు ఈ ఎన్నికను ప్రతిష్టాత్మకంగా తీసుకుని గెలుపు వ్యూహాలు రచిస్తున్నాయి.. కలిసొచ్చే అంశాలను లెక్కలేసుకుంటున్నాయి.. ప్రధాన, ప్రతిపక్ష పార్టీల్లోని ముఖ్యనేతలకు ఈ ఎన్నికలు ఇజ్జత్ కా సవాల్ గా మారాయి.. ఈ ఎన్నికల్లో అభ్యర్దులు ఓడినా.. గెలిచినా.. ఆ నలుగురి మీదే అందరి దృష్టి ఉండబోతోంది..దీంతో వారు స్టాటజీతో ముందుకెళ్తున్నారు..
పట్టభద్రుల ఎమ్మెల్సీ ఎన్నికకు జనవరి మొదటి వారంలో నోటిపికేషన్ రాబోతుంది.. పిబ్రవరి చివరి వారంలో ఎన్నికల జరగనుంది.. ఈ ఎన్నికల్లో గెలిచి సిట్టింగ్ స్తానాన్నినిలబెట్టుకోవాలని కాంగ్రెస్ కసితో ఉంటే.. ఈసారి జెండా పాతాలన్న లక్ష్యంతో కమలం, కారు పార్టీలు పనిచేస్తున్నాయి.. అధికారం ఉన్న సమయంలోనే కారు పార్టీ ఈ స్థానం నుంచి గెలవలేకపోయింది.. కానీ సారి మాత్రం బలమైన అభ్యర్దిని బరిలోకిదింపేందుకు పావులు కదుపుతోంది..
కాంగ్రెస్ ప్రభుత్వంలో కీలక నేతలుగా మంత్రులుగా ఉన్న శ్రీధర్ బాబు, పొన్నం ప్రభాకర్ లు ఉమ్మడి కరీంనగర్ నుంచే ప్రాతినిధ్యం వహిస్తున్నారు.. వీరిద్దరు ఈ ఎన్నికల్లో ఎలాంటి ప్రభావం చూపుతున్నారనేది ఆసక్తికరంగా మారింది.. ఏ మాత్రం తేడా కొట్టినా.. పార్టీలో వారికి గడ్డుకాలం ఎదురయ్యే అవకాశం ఉంటుందని పార్టీలో చర్చ నడుస్తోంది..దీంతో వీరిద్దరూ ఇప్పటి నుంచే ఒకే స్టాటజీతో నేతలతో చర్చలు జరుపుతున్నారు.. మరోపక్క ప్రతిపక్షంలో ఉన్న బీఆర్ఎస్.. ఈ ఎన్నికపై గురి పెట్టింది.. ఆ పార్టీ వర్కింగ్ ప్రెసిడెంట్ కేటీఆర్ ప్రాతినిద్యం వహించే సిరిసిల్ల కూడా ఈ పట్టభద్రుల పరిధిలోనే ఉంది.. దీంతో ఆయన ఇజ్జత్ కీ సవాల్ గా ఈ ఎమ్మెల్సీ ఎన్నిక మారింది..
కాంగ్రెస్, బీఆర్ఎస్ కు ధీటుగా వ్యవహరిస్తోంది బీజేపీ.. రాష్టంలో బిజేపీ గెలిచిన ఎనిమిది ఎమ్మెల్యేలలో ఏడుగురు ఈ సెగ్మెంట్ పరిధిలోనే ఉన్నారు. నలుగురు ఎంపీలు కూడా ఉన్నారు.. కేంద్రమంత్రి బండి సంజయ్ కరీంనగర్ నుంచే ప్రాతినిధ్యం వహిస్తూ ఉండటంతో ఆయన కూడా ఈ స్తానంపై పట్టు సాధించాలని పట్టుదలతో ఉన్నారు.. ముఖ్యనేతలతో ఆయన వరుస సమావేశాలు నిర్వహిస్తూ.. గెలుపే లక్ష్యంగా వ్యూహాలు రచిస్తున్నారు.. పట్టభద్రుల స్థానంలో ఎవరి పట్టు ఎంతో.. ఎవరి ప్రభావం ఏమేరకు ఉంటుందో.. కొద్దిరోజుల్లో తెలియబోతోంది..
