కన్నడ నాట డ్రగ్స్ స్కాం కలకలం రేపుతోంది. ఇప్పటికే ఈ కేసులో హీరోయిన్స్ రాగిణి ద్వివేది, సంజన గల్రానీలను అరెస్టు చేశారు. తాజాగా ఈ కేసుకు సంబంధించి బాలీవుడ్ నటుడు వివేక్ ఒబెరాయ్ ముంబై నివాసం మీద బెంగళూరు పోలీసులు ఈరోజు రైడ్స్ చేశారు. అంతకుముందు, వివేక్ ఒబెరాయ్ బావమరిది, కర్ణాటక మాజీ మంత్రి దివంగత జీవరాజ్ అల్వా కుమారుడు అయిన ఆదిత్య అల్వా ఇంటి మీద కూడా పోలీసులు పై దాడి చేశారు.
ఈ రోజు బెంగళూరు సిసిబికి చెందిన ఇద్దరు ఇన్స్పెక్టర్లు వివేక్ ఒబెరాయ్ ఇంట్లో మధ్యాహ్నం 1 గంటకు ఈ దాడులు ప్రారంభించారు. పరారీలో ఉన్న ఆదిత్య అల్వాతో ఉన్న సంబంధాల కోణంలోనే ఈ దాడులు జరిగాయని అంటున్నారు. ఇక అంశం గురించి బెంగళూరు అదనపు కమిషనర్ మాట్లాడుతూ ఆదిత్య అల్వా పరారీలో ఉన్నాడని, వివేక్ ఒబెరాయ్ అతని బంధువు కావడంతో అల్వా అక్కడ ఉన్నట్లు మాకు సమాచారం ఉంది. కాబట్టి మేము తనిఖీ చేయాలనుకుంటున్నామని ఆయన అన్నారు. ఆ మేరకు కోర్టు వారెంట్ రావడంతో సిసిబి బృందం ముంబైలోని అతని ఇంటికి వెళ్ళిందని అన్నారు. వారికి ముంబై స్థానిక పోలీసులు సహకరించారని కమిషనర్ తెలిపారు. ఈ దాడి ఇంకా కొనసాగుతోందని అయన పేర్కొన్నారు.
