గ‌త సీజ‌న్‌లో ఐపీఎల్‌ను చాలా ఆల‌స్యంగా నిర్వ‌హించిన‌ప్ప‌టికీ చ‌క్క‌ని రేటింగ్స్ వ‌చ్చాయి. కానీ ఈ సీజ‌న్‌కు ప‌రిస్థితి మారింది. దేశంలో కోవిడ్ సెకండ్ వేవ్ ఎక్కువ‌గా ఉండ‌డం, అనేక చోట్ల లాక్‌డౌన్‌ల‌ను విధిస్తుండ‌డం, కోవిడ్ బారిన ప‌డిన ప్లేయ‌ర్లు, సిబ్బంది.. వెరసి ఈ సారి ఐపీఎల్ యాజ‌మాన్యానికి పుట్టెడు క‌ష్టాలు వ‌చ్చాయి. అయితే ఐపీఎల్ మ్యాచ్‌ల‌ను ప్ర‌సారం చేస్తున్న స్టార్ నెట్‌వ‌ర్క్ కు కూడా ప్ర‌స్తుతం క‌ష్టాలు మొద‌ల‌య్యాయి.
ఈ సీజ‌న్‌లో ఐపీఎల్ మ్యాచ్లకు వ్యూయ‌ర్‌షిప్ బాగా త‌గ్గింది. ఇటీవ‌ల ప్ర‌క‌టించిన బార్క్ రేటింగ్స్ ఆ విష‌యాన్ని చెబుతున్నాయి. ఐపీఎల్ 2019 సీజ‌న్‌లో మొద‌టి 17 మ్యాచ్లకు 6.07 బిలియ‌న్ల వ్యూయింగ్ మిన‌ట్స్ రాగా, 2020 సీజ‌న్‌కు మొద‌టి 14 మ్యాచ్లకు 8.34 బిలియ‌న్ల వ్యూయింగ్ మిన‌ట్స్ వ‌చ్చాయి. అయితే ఈ సీజ‌న్‌కు మొద‌టి 17 మ్యాచ్లకు 6.62 బిలియ‌న్ల వ్యూయింగ్ మిన‌ట్స్ మాత్ర‌మే వ‌చ్చాయి. 2019తో పోలిస్తే ఈ సంఖ్య ఎక్కువే అయిన‌ప్ప‌టికీ గ‌త సీజ‌న్‌తో పోలిస్తే మాత్రం ఈ సంఖ్య చాలా త‌క్కువ‌నే చెప్ప‌వ‌చ్చు.
ఇక 2019 సీజ‌న్‌లో మొద‌టి 17 మ్యాచ్లకు 101 మిలియ‌న్ల వ్యూయ‌ర్లు న‌మోదు కాగా, 2020 సీజ‌న్‌లో మొద‌టి 14 మ్యాచ్లకు 116 మిలియ‌న్ల వ్యూయ‌ర్లు న‌మోదు అయ్యారు. ఈ సీజ‌న్‌లో మొద‌టి 17 మ్యాచ్లకు 105 మిలియ‌న్ల వ్యూయ‌ర్లు న‌మోదు అయ్యారు. ఈ క్ర‌మంలోనే గ‌త సీజ‌న్‌తో పోలిస్తే ఈసారి ఐపీఎల్‌ను చూసే వారి సంఖ్య కూడా బాగా త‌గ్గింద‌ని స్ప‌ష్ట‌మ‌వుతుంది. ఈ క్ర‌మంలోనే ఐపీఎల్ మ్యాచ్ ల‌లో యాడ్స్‌ను ఇస్తున్న అడ్వ‌ర్ట‌యిజ‌ర్లు స్టార్ నెట్‌వ‌ర్క్ త‌లుపు త‌డుతున్నారు. త‌మ‌కు యాడ్‌ల‌లో డిస్కౌంట్లు అయినా ఇవ్వాల‌ని లేదా కొన్ని నిమిషాలను అద‌నంగా అయినా పెంచాలని వారు కోరుతున్నారు. అయితే దీనిపై స్టార్ నెట్‌వ‌ర్క్ స్పందించాల్సి ఉంది.
